Bajaranê Berlin û Freiburgî yê Almanya, bajarê Marsilya yê Fransa û bajarê Zurihî yê Swîsre de serkêşîya Têgêrayîşê Ciwananê Şorişgêran (TCŞ) û Cinîyan ê Ciwanan ê Têkoşeran (TÊKO-JIN) de tecrîdê serê Rayberê Şarê Kurdî Abdullah Ocalanî ame protestokerdene.

Berlin de seba ke bale biancê tecrîdî ser ciwanan Unîversîteya Humboldtî de çalakîye kerde. Ciwanan derheqê cuye û rewşa Abdullah Ocalanî de broşurî vîla kerdî.

Freiburg de zî ciwanan meydanê Alten Synagoge  pê çalakîya bêîteatîya sîvîle bale ante tecrîdê giranî yê serê Abdullah Ocalanî ser. Ciwanan tecrîdê 22 aşman sey sûcê merdimîye name kerd û vat: ''Kam ke vera tecîrdî bêveng bimano sûcdar o.''

Marsilya de zî tecrîdê serê Abdullah Ocalanî û hêrişê dewleta tirke ya îşxalkere ameyî protestokerdene.

Zurih de zî ciwanan vera tecrîdê giranî yê serê Ocalanî  kitabxaneyê beşê huqûqî yê unîversîte de çalakîye kerde.