23yê kanûna 2022yî de paytextê Fransa Paris de hêrişê vera Merkezê Kulturê Kurdan ê Ahmet Kayayî de Endama Konseya Rayberdişî ya KCKyî Evîne Goyî, hunermend Mîr Perwer û welatperwer Abdurrahman Kizil ameybî qetilkerdene. Dadîya Mîr Perwerî Fîlîze Aydin vizêr nêweşxane de dinyaya xo bedilnaye.

Têgêrayîşê Cinîyan ê Kurdan ê Fransa (TJK-F) wefatê Filîze Aydinî ser o mesajê serweşîye weşana û vat: ''Mîr Perwer deyîra xo de hesreta xo ya dadîye nuştbî. Dadîya ci zî dejê Mîr Perwerî ra sewqê nêweşxaneyî amebî kerdene û dinyaya xo bedilnabî. Dadîya ey qezayê trafîkî de felç mendbî, wefatê lajê xo ra dima zî wedarîyabî nêweşxaneyî. Dadî Fîlîze wextê definkerdişê Mîr Perwerî û mudaxeleyanê hêzanê dewleta tirke de bi qîrayîşê xo erd û asmên qelişnabi. Dadîya ey seba lajê xo lorîkî vatbî û nêweşxane de dinyaya xo bedilnaye. Qîrayîşê dadîya Mîr perwerî û ê pêro dadîyanê kurdan emanetê cinîyan ê kurdan ê. Qesasê dadîya Mîr, Evîne, Abdurrahman û pêr embazanê ma do bibê şorişê ma yê cinîyan. Sereyê şarê kurdî û cinîyan ê kurdan weş bo.''