Ekîm Polato 25 serre 2017 ra nata zîndan de yo û tede nêweşîya agromegalî est a. Seba ke nêno tedawîkerdene qamê ci 1,76 ra resayo 2 metreyan. Dadîya Polatî Songule Îlker 158 rojî yo seba lajê xo Nobeta Edaletî kena. Dadî Songule Îlker derheqê nobete de ANFyî rê qisey kerd.

Songule Îlker pare kerd ke agromegalî nêweşîyêk a ke seba ke tumorê hormonê pîlî zêdîyeno beden de virazîyeno. Songule Îlker da zanayene ke lajê ci Ekîm 5ê êlula 2016î de ameyo destbendkerdene û 27ê êlula 2016î de zî sey mesuldarê teqayîşêkê Kuçukçekmece tepişîyayo. Dadî Songule vat: ''Wexto ke na bomba teqabî lajê mi tepişte bi. Ciwanêkî nameyê lajê mi dayo û îşkenceyê polîsan ra lajê mi no sûcdarkerdiş qebul kerd. Lajê mi vêşnayîşê wesayîtan û bombayan ra ameyêne muhakemekerdene la dima vera dîyabi. Lajê mi seba ke elewî yo û kurd ci rê ceza dîyaye.''

Songule Îlker dîyar kerd ke Dezgehê Tipê Edlîyî nêweşîya lajê ci manîpule keno û vat: ''Înan îdîa kerd ke lajê mi de agromegalî nê sendromê Marfanî est o. Dima zî lajê mi nêame sewqkerdene. Tebaxe de qamê lajê mi 20 santîmetreyan derg bibi. Hînî lajê mi nêeşkeno milê xo berz bikero. Nêweşîya i ra zerrî, gurçik û esteyê ci de zî nêweşîyî est ê. Lajê mi rê ortopedî lazim o. Ganî o cade nêweşxane de bêro tedawîkerdene. Lajê mi terkê mergî bîyo. Eke çîyêk bêro sereyê lajê mi mesuldarê ci Wezîrîya Edaletî û îdareyê zîndanî yo.''