Dayîkanê Şemeyî, reya tewr verêne seba nêzdîyanê xo yê ke destenbendkerdişan de ameyê vîndîkerdene, 27’ê Gulane 1995 de Meydanê Galatasarayî de dest bi çalakîya xo kerd. Dayîkê Şemeyî bi wesîlaya serrgêra 24’ine Meydanê Galatasarayî de ameyî têhet. Parlamenterê HDP’yî Oya Ersoye, parlamenterê CHP’yî yê Stenbolî Sezgîn Tanrikulu, Sereka Beşê ÎHD’yî ya Stenbolî Gulseren Yolerî paştdayîş da Dayîkanê Şemeyî.

Ma do ser bikewê

Dayîkê Şemeyî, şîyî Meydanê Galatasarayî yo ke bi barîyeran ameyo girewtene de qerefîlî ronayî. Dayîka Murat Yildizî yo ke destenbendkerdiş ameyo vîndîkerdene Hanîfe Yildize qisey kerd û vat, “Ma do seba temsîlkerdişê vîndîkerdîyan tîya peykerêk bivirazê. Ma do ser bikewê, şima vîndî bikerê.“

Hemsera Fehmî Tosunî yo ke destenbendkerdiş ameyo vîndîkerdene Hanim Tosune zî vat, “No meydan cayêko ma Dayîka Berfe kerda raywane yo. Ma nê meydanî de soz da vîndîbîyayanê xo. Ma do vîndîbîyayan û Meydanê Galatasarayî qetî fek vera nêdê.”

Dayîkan dimayê eşkerayîye, serê Abîdeyê Serre yê 50’ine de pankarta bi nuşteyê “Ma Galatasaray î ra fek nêverdanê” û qerefîlî ronayî. Bado keyeyî destê fotografê vîndîbîyayîyan Meydanê Galatasarayî ra ver bi ÎHD’yî rayra şîyî.