Emîne Şenyaşara ke laj û mêrdeyê ci hetê merdimanê Wekîlê AKPyî Halîl Îbrahîm Yildizî ra kişîyayî lajê xo Ferît Şenyaşarî reyde verê Edlîyeya Riha de nobeta xo ya edaletî rê roja 88. de dewam kena.

Keye seba ke waştişname bido Serdozgerîya Komare ya Riha şi edlîye û waşt ke derheqê 23 sûcdaran de tehqîqat bêro akerdene. La waştişnameyê keyeyî ame redkerdene.

Emîne Şenyaşar naye ser o xo ra şîya û baxçeyê edlîye de şîwarî vatî. Dayîke Emîne vat: ''Homayê mi ti nê kerdişan nêvînenî'' Polîsan nêverda ke muxabîrê MA dîmenan bigêrê. Dayîke Emîne û Ferît Şenyaşar şîyî kişta edlîye de warê înşaatî yê bînaya edlîye de niştî ro.

Dayîke Emîne destê xo dayî erdî ro û vat: ''Celalê mi, Adîlê mi kamca de yê! Beno ke edalet binê nê erdî de yo, ez bikena tira veja.''

Ferît Şenyaşar xîret kerd ke dadîya xo biedilno. Dayîke Emîne vat: ''Dozger çin o, dadger çin o. Her ca ra ma fetilnenê. '' Dima Ferît Şenyaşarî dadîya xo girewte berde û ê verê bînaya edlîye de roniştî.

Keyeyî twitter de Wezîrê Edaletî Abdulhamît Gul, Wezîrîya Edaletî û Çimdarîya Heqanê Merdiman a Mîyanneteweyîye etîket kerdî û vat: ''Qesra Edaletî ya Riha de heq, huqûq û edalet yenê binpaykerdene. Ez pêro venga selahîyetdaranê ke vanê 'Tirkîya dewleta huqûqî ya' dana ke wa bêrê tîya. Tîya de zulm yeno kerdene.''