Taxa Baglikuyuyî ya qezaya Konakî ya Îzmîrî de keyeyê Denîze Poyraz de zîyaretê serweşîye yenê kerdene. Keyeyê Denîze dima ke otopsî ra agêrayî zîyaretê serweşîye qebul kerdî.

Dadîye Fehîme Poyraza ke qirkerdişî ra dima cade şîya verê bînaya HDPyî û seba kênaya xo vat 'Denîzêke şîye, do bi hezaran Denîzî bêrê' pê qerardarî, pê xurtî payan ser o mende. Dayîke Fehîme Poyraz vat: ''Bi serran o ma mîyanê têkoşînî de yê. Kênaya mi ê bînan ra ercîyayeyêr a? Ez do seba kênaya xo meberma. Ez dadîya şehîde ya. Ez pê sereberz a.''

Merdimanê ke ameyê zîyaretê serweşîye zî vat: '''Heta çilka peyêne ya gonîya xo ma do wayîrê şehîdanê xo vejîyê.'' Zîyaretê serweşîye de vera sloganê 'Şehîdî nêmirenî' ame vatene.