Dede: Birêz Ocalan eşkeno şerî biaçarno haştîye 

Wekîlê HDPyî Saît Dedeyî ard ziwan ke ê do semedê wedaritişê tecrîdê Îmraliyî ê do her ca û her şertî de têkoşîn bikerê û vat: ''Birêz Abdullah Ocalan tek hêzo ke eşkeno şerî biaçarno haştîye.''

Rayberê Şarê Kurdî Abdullah Ocalano ke 24 serrî yo Îmrali de binê tecrîdê giranî de yo, 23 aşmî yo tira xebere nîna girewtene. Wekîlê HDPyî yê yê Colemêrgî Saît Dedeyî derheqê tecrîdê Îmraliyî de  ANFyî rê qisey kerd.

Dedeyî bale ante tecrîdê giranî yê serê Abdullah Ocalanî û tepişteyanê bînan ê Îmraliyî ser û vat:  ''Yew tecrîdo mutlaq o ke bi temamî qedexeyê resnayîşî est o. Ne keyeyî ne zî avûkatî eşkenê xeberêke bîgêrê. Tecrîdo ke Birêz Ocalanî ser yeno caardene tecrîdêko taybet o.  Semedê nêvînayîşê nê ganî merdim kor û nêeşnawitişê nê ganî merdim kerr bo.  Birêz Abdullah Ocalan tek hêzo ke eşkeno şerî biaçarno haştîye.  Adresê haştîye yo.  Semedê nê şaran şansêko zaf gird o. Awanîya faşîste nê zana. Îqtîdar seba ke nê wazeno meseleya kurdan bêro çareserkerdene her roje tecrîdî giranêr keno. Hetê muxalîfî ganî nê hole bivînê. Îqtîdaro faşîst zano adresê çareyî Îmrali yo û goreyê nê polîtîka rayra beno. Ganî ê ke sîyasetê demokratîkî pawenê vera nê bêveng memanê. Eke demokrasî yeno waştene ganî meseleya kurdan bêro çareserkerdene û adresê nê zî zelal o. Eke vera pêkewtişî cuye yena pawitene ganî tecrîd bêro wedaritene. Wîna yew sîstemo ke ê ke vera tecrîdî yê, înan rê zî tecrîd yeno kerdene. Dormeyê ma pê polîsan yeno girewtene û ma şarê xo ra yenê tecrîdkerdene.  La ma do qet gamêke zî peyser meerzê û têkoşînê xo bidomnê. Heta wedaritişê tecrîdê Îmraliyî ma do her ca û her şertî de têkoşîn bikerê.''