Komîsyonê Huqûq û Heqanê Merdiman ê DEM Partî bi mesajêkî tepişteyê şorişgêrê ke 19ê Kanûna 2000î de ameybî qetilkerdene yad kerdî û bale ante tecrîd û grevê vêşanîye ser.

DEM Partî vat: ''19ê kanûna 2000î de zîndanan de tepişteyî vera awankerdişê zîndananê Tîpê F û şertanê tecrîdî çalakîyê grevê vêşanîye kerdêne. O çax bi operasyonanê dewlete 20 zîndanan de 30 tepişteyî ameyî qetilkerdene û 300 tepişteyî zî birîndar bîyî. Dewlete no qirkerdişo barbar sey 'operasyonê cuye rê agêrayîşî' name kerdbi. Nê 23 serran de qetî hesabê nê qirkerdişî nêame persayene. 

Îşkence, hêriş û tecrîdê vera zîndanan ewro zî bi heman hawayî dewam kenê. Zîndanê Îmraliyî de Birêz Abdullah Ocalanî û tepişteyanê bînan Veysî Aktaş, Omer, Hayrî Konar û Hamîlî Yildirimî ra xeberêke nêna girewtene. Vera tecrîdî tepişteyî 22 rojî yo grevê vêşanîye de yê. Dewlete çendek sîstemê tecrîd û îşkenceyî de isrardar biba tepişteyî zî hende xoverdayîş û têkoşînê xo de israr kenê.

Ma sey DEM Partî wazenê ke zîndanan de Krîterê Mandelayî yê Neteweyanê Yewbîyayeyan bêrê caardene. Ganî tepişteyê nêweşî vera bidîyê, tecrîdê Îmraliyî bêro wedaritene, waştişê tepişteyanê grevê vêşanîye bêrê caardene û rejîmê înfazî goreyê rûmetê merdimatîye bêro raştkerdene.''