Hemserekê FEDA Demîr Çelîkî derheqê tecrîdê serê Rayberê Şarê Kurdî Abdullah Ocalanî de ANFyî rê qisey kerd.

Demîr Çelîkî  vat: ''22 aşmî yo Rayberê Şarê Kurdî Birêz Ocalanî ra xebere nîna girewtene. Avûkat û merdimê ci nêeşkenê ey bivînê. Rayber Ocalanî ser tecrîdo giran, îşkence est o. Ma nê qebul nêkenê. Her merdim wayîrê fîkr û felsefeya xo yo û goreyê nê xo rêxistin keno. Bawerîya elewîyan vera îqtîdar û dewlete ya. Birêz Ocalan zî vera dewlete konfederalîzmê demokratîkî nîşan dano. Sey sîstemê ocaxî Reya Heqî wazeno. Na zî raştîya elewîyan a.

Elewîyan heta nika tim vera dewlete, neheqîye têkoşîn kerdo. Paradîgmaya Birêz Ocalanî ya ke Rojawan de ameye awankerdene mojena ke senî şarî û bawerîye pêro pîya ciwîyenê. Sîstemê elewîyan û Ocalanî sey yewbînan o. Dewlete wazena şaran asîmîle bikero, qir bikero. No zî nîno qebulkerdene. Her kes wayîrê ziwan û nasnameyê xo yo. Aye ra her kes wayîrê heqê xo yo. Elewîyî îşkence nêwazenê, tecrîd nêwezanê, asîmîlasyon, qirkerdiş nêwazenê. Ma Rayber Ocalanî sey xo zanê, coka fîkr û felsefeya ey fikr û felsefeya Raya Heqî yê, heqîqatê elewîyan ê.

Dewleta tirke pê tecrîdî wazena ke Birêz Ocalanî şarê kurdî, şaranê bindestan ra raqilno. Dewlete zana ke şarî fikr û felsefeya ey ra hêz genê, xover danê û wayîrê haştîye vejîyenê. Dewlete 22 aşmî yo tecrîd kerdo giranêr ke şerê leyminî giran bikero. Avaşîn, Zap û Metîna de şarî kurdî, şervananê kurdan ser bombayan varnena. Çekê kîmyewîyî yenê şuxulnayene. Çîyo wînayên nîno qebulkerdene. Ma zî sey şaranê bînan wayîrê ziwan û nasnameyê xo yê û wazenê welatê xo de bi ercanê xo azad biciwîyê.

 Ganî ma çar parçeyanê Kurdîstanî de semedê Rayberê Azadî û Kurdîstanê  Azadî destê xo bidê yewbînan pîya têkoşîn bikerê. Keye, eşîr û bawerî çî beno wa bibo ganî ma semedê nasnameyê azadî, semedê welatê azadî wirzê payan ser. Ma tewrê çalakîyan bibê, vengê xo berz bikerê, vera faşîzmî de cayê xo bigêrê. Eke ma wayîrê heqanê xo mevejîyê, tecîrî meşiknê beno ke kurdî reyna bêrê qirkerdene.

Verê ma de weçînitiş est o. Ganî ma nê firsetî bişuxulnê. Wayîrê Îtîfaqê Kede û Azadîye bivejîyê. Şarê ma, elewîyî ganî hinî partîyê ke pabesteyê sîstemê dewlete yê înan ra dûrî viderê. Ganî ma  sey Seyîd Rizayan vera zaliman sere wedarê, berpirsîyarîya xo ya tarîxî bîyarê ca. Roje roja vinetişî nîya, roja wayîrvejîyayîş, roja wayûbiratîye, roja serhildanî ya. Rayê ma rayê heq û heqîqetî yo. Ma wayîrê rayîrê xo bivejîyê.''