Demîre: Stenbol de taban bi hempar

Hemsereka HDP’yî ya Bajarê Stenbolî Esengul Demîre vat hemverê xespkerdişê heqê namzedêk ke ameyo weçînitişî de, hemverê nêheqîya qebûlnêkerdişê rayanê hemwelatijan de taban ame têhet û bi hempar.

Hemsereka HDP’yî ya Bajarê Stenbolî Esengul Demîre ard ziwan ke dimayo ke heqê îradeyê Stenbolî ame xespkerdene, înan zanayo ke do AKP-MHP hemeyê giranîya xo bido nê weçînitişê 23’ê Hezîrane, naye ra 31’ê Adare ra cîya înan na rey raste rast namzedê CHP’yî Ekrem Îmamoglûyî rê paştî daya.

Heyetê Weçînitişî yê Berzî (YSK) goreyê waştişê AKP-MHP’yo ke 31’ê Adare de weçînitişê Stenbolî yo cayî kerdibi vînî qerar dabi ke newe ra bêro viraştene. Weçînitiş ame newekerdene û Ekrem Îmamoglûyî bi se ra 54,03 qezenc kerd. Partîya Şaran a Demokratîke (HDP) her di weçînitişan de zî namzed nêmot ra û paştî daye Ekrem Îmamoglûyî. Ma netîceyê weçînitişî û tewirê HDP’yî ser o hemsereka HDP’yî ya Bajarê Stenbolî Esengul Demîre dir qisey kerd. Esengule qiseykerdişê xo de nê vatî:

“Xespkerdişê heqê namzedêk ke ameyo weçînitene û nêravêrtişê rayanê hemwelatijan nêheqîyêka pîle bîye. Pêroyîya cimatî de zî na nêheqîye bi tayê rayîran amî vatene. Na yewe ra hemwelatijan weçînitişê neweyî de zî binkewtişêko pîl da ciwînayene. Merdiman hemverê na nêheqîye de îradeyê xo bi hawayêkê zelalî ramot.

Dimayo ke bi zelal ke Îmamoglûyî qezenc kerd, ê kîşta spaskerdişê weçînitişê HDP’yî de nameyê MHP û ÎYÎ partî zî ard ziwan, nê weçînitoxanê ma de tayê bi sebebê şikîyayîşêk, labelê netîce de Îmamoglû şexsîyetêk o ke rastê merkezî zî temsîl keno. O vano ke ez heme dormeyan temsîl kena. Na çarçiwa de gama ma ewnênê şarê ma zaf zî muhîmî nêdaye nê çîyî. Çîyo muhîm Stenbolijan rê seypê têgêrayîş o.

Seba ma û hezanê demokrasîyî yê bînan esil nika dest pêkerd. Ma do seba kontrolkerdişê sozan û bicaardişê waştişanê şarî cehd û motive bikerê. No kar tena kamîyêk yan zî şexsêk rê nêno verdayene. Cimatêk ke bi serran o bi hawayêkê cidîyî bîyo birîndar esto. Stenbol de rant bîyo û polîtîkayê ke şaristan rijnayo ameyê rayraberdene. Hemverê nê de ma do muxalefetê xo û pawitişê menfaate şarî bidomnê.”