Roniştişê Hemserekê Pêroyî yê Partîya Demokratîke ya Şaran (HDP) yo verên Selahattîn Demîrtaşî yê dewaya bingeyên a  ke xo tede sey rehîne name kerd Mehkemeya Giran a 19. ya Anqara de roja dîyine de ame kerdene.

Demîrtaş Zîndanê Edîrne ra bi rayîrê sîtemê SEGBÎSî tewrê mehkemeya xo ya ke Kampûsê Zîndanê Sîncanî yê Anqara de ameye viraştene bi.  Demîrtaşî derheqê qiseykerdişanê fezlekeyê 3. o ke derheqê ci de ameyo amadekerdene de vat heme aîdê ey ê  û semedê çarekerdişê probleman ameyî kerdene.

Dermîrtaşî ard ziwan ke êyê ke ganî bêrê hukmkerdenê berpirîsyarê hukmatî yê û qina qisey kerd: ‘‘ Ez û Fîgene xanime serekwezîrê welatî nêbî û HDP zî hukmat nêbi. Erdogan serekkomer bi û heme kontrol înan de bi. Roja verêne  seke barîqatî ameyî ronayene eke hukmatî bi dîyalogî nêzdîyeci bibîyêne çilka gonî nêayene rişnayene. Ne merg bîyêne ne zî rijnayîş. La no goreyê karê AKPyî nêbi. AKP wina nêwaştêne. Îqtîdarê AKPyî qirkerdiş kerd. Cizîre û Sûr  de sivîlî mirnayî derguşî, qijî mirnayî. Seba ke mi nê vatî derehqê mi de xeylêk dewayî ameyî akerdene ke mi înan rê heqeret kerdo.

Şarî rê zulm kerd kewtî çimeyê rakewtişê înan şar qetil kerd û rencîde kerd. Dêsanê şarî ser o zî ‘şima do hêzê tirkî bivînî‘ nuşt. Ma vera naye senî eşkenê bêveng bimanê. Heme welat tersî ra bêveng bimano zî ma sey HDPyî vera înan milê xo çewt nêkenê. Cemîle Çagirca qije bî. Hetê nişandarê tujî ra ameye qetilkerdene seba ke qedexeyê teberî esto destûr nêdîya meyîtê ci bêro definkerdene. Dadîya ci meyîtê kênaye xo dolabê cemedî de pawit ke wa mehelisîyo.

 Înan ke nê sûcî kerdî şima înan hukm nêkene û nêşine înan ser. Êyê ke şima rîye derbe ra eştî zere şima înan ra zî nê persan nêpersayî, nêeşkenê bipersê zî. Ma hendê bêhesîyet û bêanor nêyî. Eke hewce bikero ma azadîya xo ra zî verêne la milê xo çewt nêkenê. Coka ez peyê heme qiseykerdişanê xo de ya. Ganî ma îredeyê sîyasîyî hîna xurt ramotene û ê qirkerdiş û rijnayîşî vindarnayêne. Seba ke ma vernîyê ci nêgirewt ez vera şarê xo mehcup a la vera mekemeya şima ez xo sey sûdarî nêvînena coka ez pawitişê xo nêkena.

Qirkerdişê wehşî ameyî kerdene ganî nînan mevajê? Şima vane qey şaro ke nê qirkerdişan rê bi şahîd nînan xo vîrra keno?. Nê qirkerdişî çimeyanê gazî ê Hîtlerî de ney Cizîre de Sûr de bîyî.  Şaro sivîl ame qetilkerdene ûca grûbê mîlîtananê biçekan çînêbî. Berpirsîyarê sîyasîyî AKP yo, Erdogan o Davutoglu yo. Hukm ganî biperso vajo ê sivîlî senî ameyî kiştene? Derheqê ci de cigêrayîş biekro. La xora seba ke hukm goreyê îqtîdarî têgêreno mela ê rojî badê nê hukmatî  bêrê.‘‘