Hemserekê HDP’yî yo verên Selahattîn Demîrtaşî derheqê weçînitişê Stenbolî de vat weçînitoxî wa goreyê qerarê partîye rayanê xo bişuxulnê û vat, “Seba ewroyî ma bawer kenê ke ganî vatişê birêz Îmamoglûyî bêrê destekkerdene. Ez bawer kena ke na babete de têmîyanbîyayîşêk yan zî bêqerarîyêk çina.”

Demîrtaşî serê hesabê xo yê Twîtterî ra nê vatişî pare kerdî:

“Merhaba embazêne, şima senên ê? Ma rind ê. Bi xoverdayîş û umîdî ma şima temaşe kenê. Weçînitişê Stenbolî yo ke bizorî yeno tekrarkerdene rê tay mend. Tewirê HDP’yî hetê merkezê pêroyîyî ra xora ame eşkerakerdene, şima zanê. Ez bawer a ke şima do çîyo ke lazim o bikerê.

Ez vana qey têmîyanbîyayîşêk yan zî bêqerarîyêk çina. Goreyê mi ganî çinbo zî. Çunke no weçînitiş weçînitişêko zafî ra weçînitiş nêyo. Eke ma wazenê demokrasî, edalet, seypêyî û azadîye rê rayîr akerê ganî ma biewnîrê tewirê HDP’yî yê weçînitişî ra.

Ma hemwelatijî wazenê mîyanê seypêyî, wayeûbiratî û aşitî de pîya biciwîyê. Ma heme dej, zulm û nêheqîyanê pîlan ciwîyenê. Rixmê nê de zî ma çi rey umîdê xo yê rojanê xasekan nêkerd vînî, çunke ma seba nê mucadele kenê.

Merdimê xasekî yê Stenbolî… Seba hemverîye û dişmenîye bikerê nê; seba qutubekerdişê cimatkîyî hîna bikerê vêşî nê; seba menfaatanê şexsîyan nê; seba ameyoxê roşinî yê domananê ma raya xo bişuxulnê.

Wa bêro famkerdene ke bê HDP’yî, bi cîyakarîya hemverê HDP’yî tu çîyêk nêbeno rind. Wa tayê zî bizanê ke “bizor rindekîye” nêbena. Şima heminan rê bi bêrî û zerrî ra silamî…”