Pirdê dostîye yê mabênê bajarê Dêrikî yê Rojawanê Kurdistanî yo ke vera hêrişanê DAÎŞ’î û ambargoyê hêzanê herême de mucadeleyê payramendişî dano û qezaya Frîedrîchschaîn-Kreuzbergî ya paytextê Almanya Berlînî sey fermî ame qebûlkerdene.
Pêkerdişê projeyê Way û Biratîye yê Dêrik û F.Kreuzbergî paytext Berlîn de bi merasîmêk ame îmzakerdene. Hemşaredarê Dêrikî Rojîn Çeto û Feremez Hemmo, hetkarê hemşaredarîye Nahrîn Malkî, sereka Frîedrîchschain-Kreuzbergî Monîka Hermanne û xeylî kesî tewrê merasîmî bîyî.
Merasîmî de hemşaredara Dêrikî Rojîn Çeto ya ke qisey kerd bale ante muhîmîya projeyê Way-Biratîye ser û sere de sereka Kreuzbergî Monîka Hermanne şarê Kreuzbergî dawetê Dêrik kerd û qalê sîtemê înan ê xoîdarekerdişê kerd. Dimayê qiseykerdişan îmzayî ameyî eştene. Mabênê Şaredarîya qezaya Kreuzbergî yê paytextê Almanya Berlîn û bajarê Dêrikî ya Kantonê Cizîrî yê Rojawanê Kurdistanî de prosesê Way-Biratîye sera 2017’î dest pêkerdbi.