Partîya Sostalîste ya Bindestan (ESP) vizêr Heyata Konferansî ya Şaredarîya Dêrsîmî de panelê ''Vera polîtîkayanê zext û tecrîdî yê zîndanan, têkoşîno yewbîyaye'' organîze kerd. Panelo ke moderatorîya ci Hemşaredarê Pêrî Orhan Çelebî kerde, Wekîlê HDPyî yê Kocaeli Omer Faruk Gergerlioglu, Sereka Şubeyê Îstanbulî yê ÎHDyî Gulserene Yoleri û Meclîsê Cinîyan ê Sosyalîstan (SKM) ra Satiye Ok sey qiseykedogan tewrê ci bîyî.

Satiye Ok vat: ''Tecrîd têna zîndanan de nê warê komelkî de zî vila bîyo. Nê prosesî de keso ke nêame tepiştene û tehdîtkerdene nêmend. Yew welat pê zîndananê xo yeno vînayene ke senîn o. AKPyî no welatyo açarna goristanê zîndanan.''

Gulserene Yolerî zî vist vîrî ke tepişteyî têna nêweşîye ra zîndanan de nêmirenî û vat: ''Demê peyênî de rîyê îşkence û muameleyê xirabî ra xokiştişî zêdîyayî. Tecrîd metodêkê îşkenceyî yo. Rixmo ke îşkence qedexe yo, metodê îşkenceyî çend şino sîstematîk yenê caardene. Tecrîd hem hetê ruhî ra hem hem zî hetê bedenî ra merdiman rijneno.''

Omer Faruk Gergerliogluyî zî ard ziwan ke zîndanan de binpaykerdişê heqanê tewr giranî qewimîyenê û vat: ''Eke ma wazenê heqanê merdiman qale bikerê, ganî ma verî qala zîndanan bikerê.6 serranê peyênan de 2 mîlyon û 200 hezar kesî 'cipersayîşê terorî' ra ravertî. Zîhnîyeto ke bi milyonan sey terorîstî hukm keno biproblem o.''