Bala Dêrsimî weçînayîşanê 14ê gulane de ya. Partîya Çep a Keske do bi namzeta xo Aytene Kordu şaristan de xebatanê weçînayîşî rê dewam kena.

Qezaya Pilurî ya Dêrsimî de hemwelatîyan PÎRHA rê qisey kerd û înan weçînayîşan ra hêvîyê xo rêz kerdî.

Hemwelatîya bi nameyê Makbule Şayli waşt ke weçînayîşan ra pey hînî haştî û aramîye bêrê welatî û vat: ''Wa meseleyê ma Meclîs de bêrê ziwanî û bêrê çareserkerdene.''

Hemwelatîyêkê bînî pare kerd ke domanê/a ci 6 serrî verî zanîngeh qedînayo la karêk nêdîyo. Hemwelatîyî wina vat: ''Ma haştîye wazenê. Wa efû bêro û ciwanê ma bixelisê. Dewlete dewa ma vêşnaye û nika zî madenî ardî dewanê ma. Ma perwerdeyê bi ziwanê dayîke wazenê.''

Hemwelatîyê bi nameyê Faysal Gultakurî vat: ''Ma hêvî keno ke no îqtîdar şoro. Ganî no sîstem bêro rijnayene.''

Elîfe Gundogan ard ziwan ke ê hêvî kenê ke weçînayîşan ra pey her çi do bibo rindêr û vat: ''Kîloyêkê pîyazan 30 lîra bîyo. Ma mîyanê zehmetîyanê pîlan de yê. Wa hînî şîdetê vera cinîyan biqedo.''

Gonule Demîr waşt ke wa meseleyê ciwanan bêrê çareserkerdene û vat: ''Ma sey elewî û kurdan zaf neheqîye dîye coka hînî ney nêwazenê.''

Gultazîye Yeleser vat: ''Nika ma dewrêkê tarîyî de yê. Ez hînî rojanê roşnîyan ra bawer nêkena. Ma teyna seba ciwananê xo hêvîyan kenê.''