Polîtîkayê dewleta Tirkî yê xirakerdişî yê bajaranê Kurdistanî dewam kenê. Nê polîtîkayî hîna zaf bajaranê serê sînorê Vakur-Rojawanî yenê rayraberdene. Psîkolojîya koçberanê ke şerê Sûrîye ra remayê dewlete îstîfade kena. Dewleta Tirkî ke destûr dana fuhûşî, tîryakî û mafyaya organan, nê bajaran de binê kontrolî de nê karan kena.

Fuhûş bajaranê pîlan ê Vakurî ra ke sere sînorê Rojawan-Vakurî de yo, Riha de bi destê dewlete her ke şino hîna beno zêde. Goreyê hayîdarîyanê çimeyanê cayîyan Riha de 850 ra zêdeyêr keyeyê fuhûşî estê û no zî bi zanayîşê asayîşê Riha ke binê kontrolê AKP’yî de yeno kerdene. Asayîşî vato, ‘Bi kontrolê ma yo’.

Cinîyêka 35 serrî ya ke maya 6 domanan a û mêrdeyê ci şer de ameyo kiştene vat, “6 domanê mi estê. Seba ke ez hendî nêeşkayêne înan weyî bikerî mi kerd ke ez xo bikişî. Labelê teberê mi de çewê înan çino ke înan weyî bikero. Naye ra mi xo nêkişt. Gama ma ameyî tîya ma vat qey ma do reyna cuyêk xo rê awan bikerê. Ma vat herinda ke ma mîyanê Esad û muxalifanê selefîyan de manenê, belkî ma bi ameyîşê tîyayî xo rê cuyêk awan bikerê. La ma dî ke rejîmê Tirkîya yê Esadî ra xirabêr o.

Mehlaya ma de xeylî cinîyî, bi hayîya mêrdeyanê xo fuhûş kenê, bi fuhûşî pîzeyê xo kenê mird. Gama ke ma şinê verê sazîyanê dewlete ma vanê, “Qey ma zî fuhûş bikerê?” Ê cewab danê, vanê, “Ma se kerê? Yan şirê welatê xo de bimirê, yan zî şima zî fuhûşî bikerê. Çî yê şima înanê ke fuhûşî kenê ra kemêr o?”

Cinîyêka bîne ke zafaneyê keyeyê aye şer de merdo vat, “Cinîyê Sûrîyeyijî nêçarîye ra fuhûş kenê. Ê ke nêkenê zî înan ser o zordarî kenê. Mêrdeyê înan zî zanê. Mêrdeyî zî nêçarîye ra fuhûş kenê. Riha hendî bîya bajarê fuhûşî. Ez xeylî koçberan nas kena ke velikê xo rote. Ê ke karê tîryakî kenê û roşenê zî estê. Hal her ke şino beno xirab. Dewleta Tirkî ma ser o fuhûşî ferz kena.”