Hemserekê DADî Mustafa Karabudakî vat ke, hêrîşkarê vera cemxaneyî rê raporê ‘hişê ey sereyê ey de nîyo’ reyde wazenê ke serê na babete bigîrê.

30ê temmuze 2022î de çar sazgehanê elewîyanê Anqara rê hêrîşî ameyî kerdene. Hemserekê Komelê Elewîyan ê Demoktarîkan (DAD) Mustafa Karabudakî ke sere ra heta nika na dewa taqîb keno, ANFyî rê qisey kerd. Karabûdakî dîyar kerd ke roja yewine ra yo ke panc avûkatî taqîb kenê, nê şeş aşman de qet belge û agahîyêk înan rê nêameya dayene û vat, ‘‘Îdîanameyî de, nameyê sazgehanê ma zî nêvîyareno.’’

Karabûdakî wina vat, ‘‘Do rapor dadgehî de qebûl bikerdêne. Bi mudaxeleyê avûkatanê ma, no çî nêbî. Bi no hewa reyna nêweşxaneyêkê tam bi teşekulî ra yan zî Sazgehê Tibî yê Edlî ra ame waştene ke rapar bêro teyîtkerdene.’’

Karabûdakî ard ziwan ke wextê Selçukî, Osmanîyan û dewleta tirke de zî serdestî nêeşkîyayê sereyê komelî bidê ronayene û wina vat, ‘‘Her prosesî de hewl dayî ke polîtîkayê qirkerdişî, koçberî û surgunî komelî ser o bidê kerdene. Ewro zî ê polîtîkayî dewam kenê.’’

Hemserokê DADî Mustafa Karabudakî bala ante polîtîkaya hêrişkare ya vera elewîyan ser û wina vat, ‘‘Bi qirkerdişan nêeşkîyayê komelê elewîyan çin bikerê, nika zî wazenê elewîyan asîmîle bikerê. Tewr peynî dîyanetêkê elewîyan awan kerd.  Dewamîya Projeya Camî-Cemxane ya ke nêeşkîyayî bîyarê ca. Elewî, kurd, armenî, pêroyê bawerîyan, şar û nasnameyê ke nê cayan ra ciwîyenê, gere bieşkîyê bi ziwan û şexsîyetê xo biciwîyê. Waştişê elewîyan zî no yo.