Endamê Heyetê Rayberdişî yê Partîya Demokratîkî ya Şaran (HDP) yê Elbîstanî  Îbrahîm Akarî ke erdlerzî de keyeyê xo ra 4 kesî vindî kerdî, ard ziwan ke bajaranê ke dewlete nêyena hetkarîye, şar bi îmkanê xo binê xirban ra merdimanê xo vejeno. 

Akarî bale ante ser ke  erdlerzî ra dima se ra 80ê Elbîstanî tîya terknayo û vat, ‘‘No dewamê polîtîkayê asîmîlasyonî yê dewlet o’’ Akarî ard ziwan ke wekîlê HDPyî û hemşaredarê ke herinda înan de qeyûm amebi cakerdene, pêro bi koordînasyon ameyê herême û vat, ‘‘Pêroyê HDPyî seba hetkarîye seferber bîyî û ameyê herême. Hewl dayî ke hetkarî biresnê Nûrhak, Ekînoz, Afşîn û dewanê tewr dûrîyan. Koordînasyonê înan de problemêk çin bî. Hema ma de  dewlete çîn a la ma bi koordînasyonê HDPyî yê komunalî vejîyayî meydan û ma hema zî dewam kenê. Ma hem CHP hem zî Cemxaneyan reyde pîya xebitîyayî. Wa her kes bêro cêrzemînê Cemxaneyî ra  hewcedarîyanê xo bigîro.’’