Çeteyê bi nameyê Abdulbasît el sarûto ke wextêk tîmê neteweyîyî yê Sûrîye de payedar bi, gama şerê xomîyanênî yê Sûrîye de tewrê DAÎŞ’î bibi vatibi ‘Ma do Elewîyan telef bikerê’ bibi sebebê razînêbîyayîşan. Çeteyê DAÎŞ’î el Sarût çend rojan verî Tirkîya de nêweşxane de merd. Sarût nê wextanê peyênan de fermandarê organîzasyonê Ceyş’ul Îzze ya ‘Artêşa Sûrîyeya Azade’ bi. Seba Sarûtî Reyhanli de merasîmêkê cenaze yo kîtlekî ame viraştene û xeylî çeteyê DAÎŞ’ijî zî tewrê merasîmî bîyî. Na yewe Elewîyan ê Ereban ê herême fîna mîyanê ters û qesawetî.

Vervatoxê Meclîsê Şarî yê Antakya Hasan Ozgunî vat şero ke new serrî yo bi çetinî herême de dewam keno û qewimîyayîşê bi nê hawayî tesîrêko pîl cuya înan ser o kenê, cuya înan fînenê mîyanê halêkê bitehlukeyî û vat, “Têgêrayîşo asan ê organîzasyonanê bi nê hawayî yê Tirkîya, bicabîyayîşê înan ê bi hawayêkê azadî yê Tirkîya têkilîya xo rasterast prosesê sîyasîyî dir esta.” 

‘Ma Her Tim Seba Xoverdayîşî Amade yê’

Ozgunî pêhesna gefê ke înan rê yenê wendene tena gef nêyê, organîzasyonê bi nê hawayî hetê bînî yê sînorî de merdimanê înan kişenê, dewanê înan vêşnenê, talan kenê û Hatay de zî xeylî çalakîyan virazenê. Ozgunî vat, çend mengî verî înan kerdo ke Baregeyê Leşkerî yê Amerîka yê Hatay Serînyolî seba perwerdeyê leşkerîyî yê cîhadîstan bişuxulnê, la ê hemverê nê de vindertê û vat, “Seba ke ma erdê xo de nêbê koçber ma amade yê ke tim xover bide.”

Ozgunî vist vîrî ke Sûrîye de nika qirkerdişê Elewîyan yeno kerdene, beno ke şer hetê Tirkîya de zî xo ramojno û vat, “Gef û tehluke new serrî yo hemverê ma de dewam kenê.”

‘Cenaze Peyamêkê Seba Qirkerdişê Şaran bi’

Vervatoxê Însîyatîfê Şarî yê Defne Selman Altinozî zî ard ziwan ke goreyê eşkerayîya walîtîye destpêkê şerî ra 501 hezarî Sûrîyeyijî ameyê Antakya û vat, “Wextêkê nizdî verî cenazeya kiştoxêkê cîhadîstî herêma ma ra amî wedartene û bi nê hawayî peyamêko winayên da; eşkenê nê bikerê wasitayêk seba bicaardişê qirkerdişê mabênê şaran. Elewîyê Erebî şaro verên û cayî yê na herême yê û vanê ganî qewimîyayîşê bi nê hawayî bêrê astengkerdene û asayîşê cuya ma bêro bicaardene.”