Endamanê Partîya Sosyalîste ya Bindestan (ESP) û Federasyonê Komeleyanê Ciwananê Sosyalîstan (SGDF) vera tecrîdî serê Rayberê Şarê Kurdî Abdullah Ocalanî û binpaykerdişê heqan ê zîndanan dest pê grevê vêşanîye kerdbi. Ewro zî Adana de endamanê ESP û SGDFyî bii şîarê ''Ma do paştdayîş pîl bikerê, tecrîdî bişiknê'' Şubeyê ÎHDyî yê Adana de dest pê grevê vêşanîye kerd. Îdarekarê ESPyî yê Adana Emrah Topaloglu û endamê SGDFyî Tuncay Yildirim Ozen do çalakîya grevê vêşanîye bikerê.

Endamê ESP û SGDFyî, temsîlkarê rêxistinanê komelê sivîlî zî tewrê eşkerayîye bîyî. Topalogluyî dîyar kerd ke ê rewşa tepişteyanê nêweşan ra qerqilîyenê û seba têkoşînê hemparî veng da. Ozenî zî ard ziwan ke ê wazenê tecrîd bêro wedaritene  û na rewşe wa biba rojdemê her kesî.

Dima eşkerayîye ameye wendene. Eşkerayîye de ame parekerdene ke Topaloglu û Ozen derheqê tecrîdî de do zîyaretê tay dezgehanê sivîlan û partîyan bikerê.