Çalakîya nobeta ke seba azadîya Rayberê Şarê Kurdî Abdullah Ocalanî, bajarê Strasbourgî yê Fransa de dewam kena, hewteyê 556. de hetê endamanê PYDyî ra ameye dewrgirewtene.

‘‘Nobeta Azadîye’’ ke seba azadîya fîzîkîye ya Rayberê Şarê Kurdî Abdullah Ocalanî, 25ê hezîrane 2012yî de Înîsîyatîfê Azadî seba Abdullah Ocalanî, daybî destpêkerdene, hewteyê 556. de dewam kena.

Her hewte komêka kurdan û dostê înan ê Ewropa, nobete dewr gênê û nobete bi no hewa dewam kena. No hewte, endamê PYDyî nobete dewr girewte. Daxil Brahîm, Ehmed Bavê Omer û Serwer Mihemed mîyanê kome de yê.

 ‘Heta ke azadîye nêra ma nêvindenê’

Daxil Brahîmo ke nameyê kome ser o qisey kerd, dîyar bi nameyê PYDyî Komployê Mîyannetewîyî şermizar kerd û vat: ‘‘Kompoloyo ke şexsê Rayber Apoyî rê ameyo kerdene, heme kurdan rê ameyo kerdene. Hêzanê mîyannetewîyan no komplo kerd, nêresayê amancê xo. Înan vatêne qey tena çend kurdî do çend rey xover bidê û dima fek tira verdê. Înan nêzanayêne ke 25 hezîrane 2012î ra heta ewro vernîya sazgehê înan a sey CPTyî de, Konseya Ewropa her hewte nobete dewr gêna û dewam kena. Amancê înan o bî ke Rayberîye tena verdê û şarê kurd bê îrade bikerê. Heta ke Rayberîye azad bibo ma do xover bidê.’’

‘Wa şarê ma bi raya Heyva Sor a Kurdîstanî hetkarî bikero’

Vervatoxê kome Daxil Brahîmî vat ke, ê seba erdlerzê Kurdistan xemgîn ê û nê çîyî ardî ziwan, ‘‘Êyê ke merdimê înan merdî, wa sereyê înan weş bo. Hêvîya ma est a ke birîndarî do weş bibê. Hêvîya ma est a ke şarê ma do bi raya Heyva Sor a Kurdistanî şarê xo yê mexdûran rê hetkarî bikero. Ma hetkarîya şarê xo nêkerê, dewlete nêkena.’’