Alî Kenanogluyo ke wextê erdlerzê peyênî de Hatay de bi, bale ante problemanê çadiran ser o û vat nê probleman mîyan de şar hêrs bîyo.

Hatay de 20ê sibate de erdlerzêk virazîya û awanîyê ke kêmî xesar girewtbî zî nê erdlerzî de rijîyayê. Erdlerzî ra dima 6 kesê ke dekewtbî keyeyê xo, dinyaya xo bedilnaye. Parlamenterê HDPyî Alî Kenanoglu ke Hatay de  û ANFyî rê qisey kerd.

Kenanogluyî ard ziwan ke, seba ke erdlerz mîyanê rojî de nêqewmîya, vernîya felaketêka bîne ame girewtene. Çunke walîyî destûr daybî ke şar 2 saetî dekewo keyeyanê xo yê bixesaran û malzemeyanê xo bivejo, coka mîyanê rojî de xeylê însanî keyeyanê xo de bîyî.

Problemê çadiran dewam keno

Kenanogluyê HDPyî dîyar kerd ke Hatay de problemê çadir, setargeh û tuwaletî hema zî dewam kenê û vat, ‘‘Çadirî, derûverê awanîyan de yenê ronayene, êyê ke çadira înan çin a, bi naylon û daran xo rê setargehêk virazenê. Coka halo ke xeylê rîskin meydan de yo. Wezîfedarê hukmatî vanê ke, ‘nêzdîya awanîyan de çadiran meronê’ la îmkanêko bîn awan nêkenê û nêdanê şarê xo ver. Gere şima îmkanê germîye, setargeh û tuwaletî ê însanan rê peyda bikerê. Şar yeno koordînasyonê HDPyî ra çadiran wazeno. No problem hema zî dewam keno.’’

Şar bihêrs o

Kenanogluyî dîyar kerd ke înan dî, wexto ke varan vareno çi yeno serê ê çadiran û da zanayene ke şar hetêk ra zaf bêzar bîyo, hetêk ra zî bihêrs o. Kenanogluyî vat, ‘‘Wexto ke ma şîyî Samandagî, şarî vatêne nêmeyê însanan dinyaya xo bedilnaya, veng ameyêne la seba ke tîmê xelisnayîşî û kepçeyî çin bîyî, ma nêeşkîyayê ê blokan hewanê.’’

Problemêko gird

Parlamenterî ard ziwan ke Serekê AKPyî Erdogan ame Hatay, la şarê Hatayî o nêdî û vat, ‘‘Erdogan û derûverê xo ameyê Hatay. Bêguman ma o nêdî, la belê ma ra vêşêr şarê Hatayî zî o nêdî. Seba ey cayêko taybet ameybî hazirkerdene, rayîrî ameybî girewtene û barîkatî ameybî ronayene. Nêverdayî ke şar bireso uca. Xora kesêkî nêwaşt şêro uca. Şar zaf bihêrs o. Mîyanê nê problemanê girdan de hewl dano ke cuya xo dewam bikero.’’