Yeno pawitene ke vîjnayîşê wekîlan  û serekkomarî yê Tirkîya 14ê gulane de bêrê kerdene. Hema ke sey fermî qerar nêdîyayo tarîxê vîjnayîşî, îqtîdarê AKP-MHPyî Ewropa de startê kampanyaya vîjnayîşî da.

Hewteyanê peyênan de hukmatê tirkî ra xeylêk wezîr û hetkarê wezîran, wekîlî û îdarekarê payeberzî sere de Almanya welatanê Ewropa gêrene û kampanyaya vîjnayîşî rayra benê.

Hukmatê almanî verê vîjnayîşan ameyîşê Serekkomarê Tirkî Recebp Tayyip Erdoganî vidarna û tay zîyaretê ci yê Berlin û bajaranê bînan betal kerdî. Erdoganî Hetkarê Serekê Pêroyî yê AKPyî û Serekê Tekîlîyanê Teberî Efkan Ala şawit. Ala welatanê Ewropa yew bi yew gêreno û kombîyayîşan de telefonî ra vengê Erdoganî dano goştarîkerdene.

Welatanê Ewropa verê referandûmê 2017î xebetê vîjnayîşî yê AKPyî qedexe kerdbî û no bibi sebebê krîzî. Naye ser o îqtîdarê AKP-MHPyî kampanyaya vîjnayîşî binê nameyê ''Ma bi tirkanê Ewropa yenê têhet'' organîze kerdî.

Kombîyayîşo ke Ala û xeylêk îdarekarê AKPyî û wekîlê verên û newe tewrê ci bîyî de Erdogan zî pê telefonî tewrê ci bi. Qedexeyê propagandaya vîjnayîşî yê welatanê Ewropa xeymê Erdoganî de nîyo. Her kombîyayîşî de pê telefonî propaganda keno. Xora çend rojî verî dîmenanê kombîyayîşanê Hollanda û Belçîka  yê ke sey mîtînganê vîjnayîşî ameyî kerdene de amebi vînayene ke Erdogan senî qala vîjnayîşî keno.

Badê Fransa, Belçîka û Hollanda Efkan Ala û ekîbê ci ravêrtî Almanya. Îdarekarê AKPyî di rojî yo merkezê dezgehê lobî yê UIDyî yê AKPyî de têdima kombîyayîşan kenê û xebatanê propaganda yê Almanya ke tede 1,5 mîlyon vîjnayoxî est ê , genê dest. Aşma adare de binê nameyê ''têhetameyîşê kulturî'', ''têhetameyîê şarî'' û ''têhetameyîşê ciwanan'' de xeylêk bajaran de do kombîyayîşê propagandaya vîjnayîşî yê AKPyî bêrê kerdene.