Avûkato ciwan Taylan Ertaş Wanî ra rêzê 8. de namzetê Partîya Çep a Keskî yo. Ertaşî derheqê faşîzmê AKP-MHPyî, meseleya kurdan de ANFyî rê qisey kerd.

Ertaşî vist vîrî ke seserra peyêne de kurdî raştê qirkerdişanê sey Gelîya Zîlane û Dêrsimî ameyê. Ertaşî vat: ''Darbeya 1960î de zî, yê 1980î de zî û xîretê Darbeya 2016î de zî kurdî ameyî cezakerdene. Ganî meseleya kurdan hînî bêra çareserkerdene. Yanî wextê ci ameyo ke kurd û kurdkî bi destûrê bingeyî bêrê pawitene.''

Ertaşî îfade kerd ke meseleya cinîyan û meseleya kurdan yewbînan ra cîya nîyê û vat: ''Kiştoxê Denîze Poyraz û Dayîke Taybete bêceza ameyî verdayene. KADES de rixmo ke zaf ziwanî est ê kurdkî çin a. Mesuldara kişîyayîşê cinîyan ê kurdan dewlete bi xo ya. Têkoşînê cinîyan ê xobîyayîşî, bi têkoşînê kurdan dest pêkerd û hêzêko pîl da înan. Ma do bi xebata xo Peymana Îstanbulî newe ra bivisnê dewrê.''

Ertaşî bale ante gefê tîryakî yê vera domanan û ciwanan ser û vat ke ê do vera nê gefan têkoşîn bikerê.

Ertaşî derheqê armancanê xo de vat: ''Sey Partîya Çep a Keske ma do Wan de pêro wekîlîyan bivisnê destî. Partîya ma do Wan de 8 de 8 bikera. Ma welat de zî do 100 wekîlîyan bivisnê destî û bibê hêzê çareserîye.''