FEDA û DAKByî eşkerayîye weşanaye û dîyar kerd ke îqtîdarê AKP-MHPyî erdlerzî zî xo rê kerdo firsendêk û çîyê ke huqûqê dinya de sey qirkerdişî yenê hesibnayene, ana serê kurdan û elewîyanê kurd-ereban.

Eşkerayîye de ameye vatene ke, ‘‘Tewr peynî Serekîya Karanê Dîyanetî fetwayêke daye û vat, ‘Mabênê domananê wayîrveteyan astengîya zewacî çin a.’

Her roja ke vîyarena, nîşanê ma dana ke îqtîdar wazeno nê erdlerzî zî bikero qirkerdiş. Goreyê zanayîşan ke vila bîyî, mafyayê organan û tarîqatî bi destûrê dewlete dest danê gedeyanê mexdûran ser o û remnenê. Helbet nê vatişî sey estaneke nêyenê ma rê. Çunke vajîyano ke, ‘Eke cayêkî de adir çin bibo duman nêwirzîyeno

Ma nê amancanê qilêrinan ê dewlete, tarîxî ra zanê. Na dewlete qirkerdişê ermenîyan de dest nêda gedeyanê ermenîyan ser o? Na dewlete qirkerdişê Dêrsimî de dest nêda gedeyanê dêrsimijan ser o? Na dewlete qirkerdişê Mereşî de dest nêda gedeyanê elewîyan ser o? Nê zîhnîyetî Şengal de dest nêda cinî û gedeyanê êzidîyan ser o? Bi kilmkî destserdayîşê gedeyan taybetmendîyê bingeyîn ê qirkerdişî yo.

Dewlete û tarîqatê aye yê nikayinî, wazenê na felakete bikerê qirkerdiş. Fetwaya peyênê ya Dîyanetî ra zî yeno famkerdene ke destserdayîşê gedeyan hetê dewlete ra problem nîyo. Ma nê mezgî şermizar kenê.’’

Eşkerayîye de ameye vatene ke, ê do babeta gedeyanê vindîbîyayeyan de taqîb bikerê û do vera hêrîşanê qirkerdişî de bi heme hêzê xo têkoşîn bikerê.