Nobeta Edaletî ya Keyeyê Şenyaşaran a  ke 9ê adar a 2021î de dîyaye destpêkerdene roja 301. de dewam kena.

Ferît Şenyaşaro ke semedê tewrbîyayîşê çalakîya Hêzanê Têkoşînê Yewbîyayeyî  perey ame Îstanbul bi waştişê paştayîşê huqûqî Komeleya Heqanê Merdiman (ÎHD) zîyaret kerd û endamanê ÎHD û Semedê Yewîye Demokrasî (DÎP) reyde pêvînayîş kerd.

Ferît Şenyaşarî  vist vîrî ke babî û wird birayê ci verê çimanê pêrune de ameyî qetilkerdene û vat herinda qetilkaran de ê yenê muhakemekerdene. Şenyaşarî  nê vatî: ''Rixmo ke hîrê serrî û nême ravêrtî hema dewayêke nêameye akerdene. Hende kesî ameyî kiştene têna yew kes yeno muhakemekerdene.  Ma kenê ke vera na nêheqîye vengê xo bidê eşnawitene. 300 rojî yo ma verê banê Edlîyeya Riha de nobete tepişene. Na çarçewe de ma rêxistinanê huqûqî qêrenê û paştdayîş wazenê la muhataban nêvînenê.''

Endamanê ÎHD û DÎPî  bale ante têkoşînê edaletî yê Keyeyê Şenyaşarî ser û mesajê paştdayîşî da. Ferît Şenyaşarî dima ra Hemsereka Pêroyî ya ÎHDyî Erene Keskîn zîyaret kerd. Keskîne ard ziwan ke vera Keyeyê Şenyaşarî bêwijdanîye yena kerdene û vat  têkoşînê Şenyaşaran semedê her kesî bîyo hêvîye. Keskîne vat ê do hetê huqûqî ra paştî bidê înan.