Fînlandîya de zanayene ke ê do sey çeteyanê DAÎŞ’î, cinî û qijê DAÎŞijê ke Kampa El Holî de yê înan zî  welatê xo rê qebûl nêkerê.

Serekwezîr Anttî Rînne û Wezîra Edeletî Anna-Maja Henrîkssone yê ke cewabê persanê partîyanê muxalefetî dayî ard ziwan ke ê do paştî nêdê ke cinî û qijê çeteyanê DAÎŞ’î bêrê Fînlandîya û eke ê bi îmkananê xo bêrê zî do derheqê înan de tehqîqat bêro destpêkerdene.

Vatişê Serekwezîr û Wezîra Edaletî bi sebebê reaksîyonan. Profesora  Unîversîteya Abo Johanna Nîemî Komîteya Heqanê Qijan ê Neteweyê Yewbîyayeyî rê gerreyê hukmatê Fînlandîya kerd. Nîemî paştnêdayîşê cinî û qijanê Kampa El Holî rê hêrsê xo ard ziwan û waşt cinî û qijî bêrê Fînlandîya.

Kampa El Holî de hemwelatijê Fînlandîya 11 cinî 33 qijî estê.

Ronayaxonê  sazgehê 'Joint Help for Kurdistan' yo ke semedê paştdayîşê cinîyan Êzidîyan ame ronayene, ra Dr Nemam Ghafourî yo ke bi dawetê rêxistinanê cimatê sivîlî semedê semîneran Fînlandîya de yo ard ziwan ke ganî cinîyê ke şîyê sefanê DAÎŞ’î heme bêrê muhakemekerdene û qijê înan destê înan ra bêrê girewtene û va: ‘’ Cinîyan ê xerîban ûca perwerdeyê çeteyan girewt. Dimayê warginayîşê Bahozî yo ke qelaya înan a peyêne bî xîlafet newe ra El Hol de ameye ronayene. Ez qet raşt cinîyêka poşman bîya nêameya. Ê vanê do qijê înan xîlafetî bidê domnayene.’’