Ganî Almanya nêbo stargehê kiştoxan

Parlamentera Partîya Çepe ya Almanya Helîn Evrîm Sommere vera kiştoxanê Qirkerdişê Sêwasî yê ke Almanya de xo ca kerdo reaksîyon da û vat ganî Almanya nêbo stargehê kiştoxan.

Endama Meclîsê Fedaralî ya Partîya Çepe ya Almanya Helîn Evrîm Sommere derheqê Qirkerdişê Sêwasî û rolê Almanya yê qirkerdişî de eşkerayîyêk daye.

Sommere bale ante ke kiştoxê Qirkerdişê Sêwasî Almanya de manenê û va: ‘’2’ê Temmuz a 1993’î  de Otela Madimakî de 35 roşnvîr,nuştox û hunermendê ke zafê înan Elewî bî bi vêşnayîş ameyî qetilkerdene. Rixmo ke qirkerdişî ser a 26 serrî ravêrtî hema qetilkarî nêameyî cazakerdene. Bi nê qirkerdişî teyna Elewîyî nê ameyoxo roşn yê merdimîye ameyo hedefkerdene.’’

Sommere vist vîrî ke tayî qetilkarê Qirkerdişê Sêwasî yê ke bi bultenê sûrî yenê cigêrayene Almanya de ca dayo xo û înan ra yewê zî bîyo hemwelatijê Almanya û wina dewam kerd: ‘’Rixmê heme vatişanê ma yê Partîya Çepe û huqûqkaranê pabesteyê dezgehanê Elewîyan Almanya bêvengîya xo pawena û bi nêtewirê xo bena paştgêrê nê qirkerdişî.’’

Sommere Qirkedişê Sêwasî sey sucê merdimîye name kerd û wina veng da Hukmatê Fedaralî: ‘’No sucêko gird o. Bi ravêrişê demê ci û huqûqê welatêk nêno sinorkerdene.  Almanya cayê paştdayîşê înan nêya. Ganî Almanya semedê muhakemekerdişê înan tê bigêro.’’