Şaredarê verênî yê Xinisî Hasan Basrî Firatî û Şaredarê verênî yê Sûrî Abdullah Demîrbaşî derheqê tecrîdê vera Rayberê Şarê Kurdî Abdullah Demîrbaşî de ANFyî rê qisey kerd. 

Abdullah Demîrbaşî pare kerd ke babeta tecrîdî mesuldarîya CPTyî ya û vat: ''Eke CPT biwazo bimojno ke dezgehêko cidî yo, neçare yo ke derheqê zîyaretê xo yê peyênî yê Îmralîyî de eşkerayîyêka cidî û qîme bido. CPT mesuldar o ke peynîya na rewşe bîyaro. 

Dewleta tirke tecrîdî sey polîtîkaya şerî şuxilnena, nêverdena ke Birêz Ocalan fikranê xo rayaumûmîye de pare bikero. Tecrîd krîzê Rojhelatê Mîyanênî xorin keno û nêno qebulkerdene. Birêz Ocalan temînatê haştîye yo, aktorêko girîng o ke şarê kurdî goş dano ci. Tecrîdkerdişê Ocalanî tecrîdkerdişê şarê kurdî yo. Coka ganî cade tecrîd bêro wedaritene. Ganî şarê kurdî, dostê înan û terefgîrê haştîye her ca de, her platform de nêrazîbîyayîşê xo yê demokratîkî bimojnê.''

Hasan Basrî ard ziwan ke tecrîd nîşaneya bêhuqûqîya vera kurdan a û var: ''Rayber Apoyî seba pawitişê heq û huqûqê kurdan xo ver da. Dewleta tirke seba ke destkewteyanê kurdan çin bikera huqûqê xo û krîteranê huqûqê globalî zî binpay kena. Sîyasetê  vera Birêz Ocalanî nêno qebulkerdene. 

Birêz Ocalan lîderê kurdan o. Verî dewletan lîderê kurdan ê sey Şêx Seîd, Seyîd Riza, Qazî Mûhammed qetil kerdbî. Dewleta tirke zî wazena vera Birêz Ocalanî wina têbigêra. Şarê kurdî ganî tarîxî ra dersan bigêra û wayîrê lîderê xo vejîyo. Ganî ma na polîtîkaya tecrîdî ya gemarine pûç bikerê. Şarê ma wa her şert û mercî de tecrîdî şermezar bikero.''