Hetê OHDyî ra bi tewrbîyayîşê Delegasyonê Vera Tecrîdî yê Mîyanneteweyî Forumê Tecrîdî ame kerdene. Vervatoxa HDPyî Ebru Gunay, Hemvervatoxê Komîsyonê Huqûq û Heqanê Merdiman  Serhat Eten û Hemvervatoxa  Komîsyonê Tekîlîyanê Teberî Feleknase Uca, wekîlî, îdarekarê partîye û xeylêk kesî tewrê forumî bîyî.

Gunaya ke forum de qisey kerd nê vatî: ''Ma ewro tîya têhetameyîşê zaf muhîmî kenê.  Nêzdîbîyayîşê Îmraliyî nê welatî de nêzdîbîyayîşê vera demokrasîyî yo.  Tecrîdê Îmraliyî tesîrê pêro welatî keno.  Ma kurdî zaf hole zanê ke şer û tecrîd yewbînan weye kenê. Ma cuya xo de tecrubeyê nê dîyî, şer û qirkerdişî ciwîyayî. Ma cuya xo de dîyî  ke şer û qirkerdişî senî pê tecrîdî yenê weyekerdene. Roja verêne yê tecîrî de ra na faşîzmê AKPyî senî semedê şerî kerdo xo çeng, pê polîtîkayanê şerî çekê kîmyewîyî şuxulnayî û qirkerdişî kerdî û hêzê demokrasîyî yê Tirkîya senî pê zîndanî tehdît kerdî, ma nê pêro dîyî.

Ma kuçeyan de raştê ablûqayan yenê. Na xora netecîya polîtîkayanê tecrîdî ya la ma do çirey têkoşînê xo ra peyser game meerzê. Şertê Abdullah Ocalanî şertê ma pêrun ê. Ma semedê xurtkerdişê têkoşînî qerardar ê. Tirkîya de bêhuqûqîye Îmrali de dest pêkerd. Heme bêhuqûqîye, neheqîye verî Îmrali de yenê ceribnayene û dima ra welatî ra vila benê. Coka ganî ma pêro pîya bi yew û vera tecrîdî vengê xo berz bikerê. Ma ewro tîya gamêka xurte eşte. Seba ke tecrîd bêro tecrîdkerdene ma forum virazenê. Ma startê nê da la no qîm nêkeno, wextê ci yo ke ma pê têkoşînî dahîna xurt vengê xo berz bikerê. Tecrîd do bin bikewo û azadîye ya yena nê herran ya zî yena.''