Parlamentera HDP’yî ya Colemêrgî Leyla Guvene, derheqê astengkerdişê tedawîya tepişteyan a dimayê grevê vêşanîye û binpaykerdişê heqanê merdiman de pêşnûmeyê perse pêşkêş wezîrê Edaletî û yê Weşîye kerd.

 Guvene wezîrê Edaletî Abdulhamît Gul û wezîrê Weşîye Fahrettîn Kocayî ran ê persî kerdî:

 92 zîndanan de babeta şopnayîşê prosesê dimayê qedîyayîşê grevanê vêşanîye de xebatêk amî kerdene?

 Eke amî kerdene, çi ame kerdene?

 Şima do na xebate rayapêroyîye dir pare bikerê?

 Hayîya wezaretê şima tewiranê keyfî û bitehlukeyan ê îdareyanê zîndanan û nêweşxaneyan ê vera tepişteyanê grevê vêşanîye ra esta?

 Derheqê nê tewiranê keyfîyan de çend gerreyî wezaretî rê ameyê kerdene?

 Derheqê kes û îdarekaranê ke gerreyê înan ameyo kerdene wezaretê şima karêk kerdo?

 Seba ke xisarêko mende bedenê kesanê ke wextêko derg grevê vêşanîye de mendê nêvirazîyo, pîya bi Wezaretê Weşîye şima xebatêk kenê?

 Seba halkerdişê mexdûrîyetê tepişteyanê ke rîyê cipersayîşî ra nênê veradayene şima do çîyêk bikerê? Hûmara tepişteyanê ke cezayê înan bîyê temam labelê rîyê cipersayîşê dîsîplînî ra nênê veradayene çend a?