Wekîlê HDPy yê Îdirî Habîb Eksikî ANFyî rê qisey kerd. Eksîkî nîşan da ke, seba ke bieşkîyê kêmanîya xo binimnê halo îstîsna îlan kerd.

Welatê mutahîdan

Eksîkî şarê herêma erdlerzî rê serweşî û şîfa waşt û wina dewam kerd, ‘‘Îqtîdarê AKPyî vano, felaketa seserre la wina nîya; verê ney zî zaf erdlerzî û afetê hîna giranî virazîyayî la yew zî nêbî wina felaketêka girde. Sebebê na felakete, metodê şaşî yê nê hukmatî yo. Seba ke vernî ci rê nêgirewt tesîrê erdlerzî hende giran bîyî. Înan no welat kerdo welatê mutahîdan.’’

Mudaxeleyêko rast nêame kerdene

Eksîkî dîyar kerd ke erdlerzî ra 36 saetî vîyartbî la hema ekîbê weşî û xelisnayîşî nêresaybî xiraban ser o û hema zî binê xirban de însanî est ê. û wina vat, ‘’36 saetan mîyan de zî îqtîdaro nikayin nêeşkîya xo biresno xirban ser o û nêeşkîya zanayîşêko rastên şarê xo rê vila bikero. Nê çîyê îqtîdarî kerd ke, no erdlerz bî felaketêke. Hema zî vajîyeno ke bonê xirban de însanî est ê û veng danê. La 36 saetî zaf muhîm bî û îqtîdar nêeşkîya mudaxeleyêko rast bikero. binê xirban bi hezaran însanan serdan ver dinyaya xo bedilnaye. Guneyê pêroyînan vîyeyê AKPyî de yo.’’

Bêlîyakatîye bîye sebebê mergî

‘‘Xebatkarê AFAD û zerrîwazî wa keyeyê înan awan bo, ma mînnetdarê înan ê. La problemê  îdarekarîya AFADî de est ê. Sebebê nê mergan û kêmmendişê AFADî rîyê îqtîdar û bêlîyakatîya înan ra yo. Serekê AFADî, walîyêko verên o û beşa îqtîsadî wenda, hetkarê serekî û mudurê afetî zî îlahîyat wendo û cuya ey dîyanetî de vîyarta. Qet zanayîşê înan ê derheqê afetan de çin o. Na bêlîyakatîye û nezanîye bîye sebebê hende mergan.

Nê erdlerzî de zî Rojawanî bombarduman kenê

‘‘Wexto ke ma çapemenî ra dî ke Tirkîya nê erdlerzî de zî Rojawanî bombarduman kena, ma şoke bîyî. Rojawan û Irak de zî erdlerz virazîya. Yew sînorê dişmenîye zî est a. No çî nêyeno qebulkerdene. Eke herinda bombakerdişî de bi artêşa xo ameyêne xirban ser o û şarî bixelisnayêne hende şarê ma nêmerdêne. Bi na felakete îmkan est bî ke pêroyê şarê Rojhelatê Mîyanênî bibo yew û pîya birînananê na felakete bipêşo la dîyar bî ke îqtîdaro nikayin haştî û weşîye nêwazeno. Beranê Rojawanî akerê û wa şarê kurd, ereb, tirk, ermenî, suryanî pêro pîya birînanê xo bipêşê.’’

Îqtîdarê Akpyî seba ke bieşkîyo kêmanîya xo binimno Halo Îstîsna îlan kerd

‘‘AKPyî seba ke prosesê na felakete de nêeşkîya wezîfeyê xo bikero halo îstîsa îlan kerd ke nêverdano na kêmanîya înan şarî rê biasa û wazeno bi nê halê îstîsnayî dekewê weçînitişî. Çîyo ke gere bikerdêne no bî; gere herêmanê erdlerzî bikerdêne herêma afetî û bi ruhê seferberîye birînanê şarê xo bipiştêne.’’

Beno ke jan vila bibo

Eksîk da zanayene ke bi nameyê Merkezê Koordînasyonê Krîzî yê HDPyî herême de xebatê weşîye, setarkerdişî û hîjyenî kenê û do nê xebatî dewam bikerê û vêşî bibê û wina vat, ‘‘Problemanê yewinan ra yew jî hîjyen o. Nê tewir wextan de seba ke awe çin a beno ke jan dest pêbikero û vila bibo. Rojanê ameyoxan de no tewir yew problem beno ke vernîya ma de bibo. Gere bi lez û bez bajarê çadirênî bêrê ronayene û nê problemê hîjyenî bêrê safîkerdene.''