Erdlerzî ra dima xeylê gedeyî hetê dewlete ra ameyê destserkerdene û aqûbetê înan nêyeno zanayene. Tay gedeyî vîlayêka Îstanbul/Beykoz a ÎHH de hetê Wezaretê Xizmetanê Komel û Keyeyan ra ameybî bicakerdene. Xeylê persî derheqê aqûbetê gedeyan de ameyî persayene la pêro bêcewab mendê.

Hemvervatoxa Komîsyonê Gedeyan ê HDPyî Nuraye Turkmen na babete ser o ANFyî rê qisey kerd.

Nuray Turkmene vat, ‘‘Sazgehê dewlete zî mîyan de, melumatêka zelale destê kesêkî de çin a, hûmara ê gedeyan zî kes nêzano.’’

Turkmene dîyar kerd ke bêbawerîya cîdî bi dewlete est a û vat, ‘‘Ma masaya xo ya krîzî de xeylê gedeyan û may û pîyê înan resnayî yewbînan. No tena zî dîyar keno ke sazgehê dewlete sere ra karê xo nêkerdo. No krîz ke erdlerzî dima vejîya meydan, krîzêko newe nîyo. Seba ney zî ma hewl danê ke destê ma ra çi bêro, ma bikerê. Ma wazenê ke sazgehê bînî yê gedeyan zî bixebitîyî û wayîrê ê gedeyan bivejîyê. Na babeta gedeyan bî têkoşînê welatîyan.

Hewce kerdêne ke sere de dewlete roj bi roje, saete bi saete rapor bidayêne. Dewlete berpisyar a ke derheqê na babetêka hende hasase de agahî bida. Seba ke no nêkerd, meselaya gedeyanê vindîbîyayeyan mîyanê şarî de bî sebebê tersî. Seba ke ma 100 serranê dewlete zanê ke gedeyê ke afetan ra dima vindî benê, yeno çi mane.’’

Nuraye Turkme wina  dewam kerd, ‘‘Wextê erdlerzî de sere de gere nasnameyê gedeyan bêro tespîtkerdene. Eke name nêro girewtene zî telefon her kesî de est o, fotografî gedeyan bêrê girewtene. Bi rojan o ke ma masaya krîzî de yê; embazê ma hewcedarîyan goşdarî kenê û hewl danê ke hetkarî biresnê. Hewcedarîyê bingeyîn ê gedeyan est ê. hewcedarîya werdî hema zî dewam kena û no zaf muhîm o.’’

Turkmene ard ziwan ke problemê weşîye tena ê gedeyan nîyî û vat, ‘‘Problemê gedeyan tena gedeyan rê nêmanenê. Bi nêweşîya gedeyî vîyarenê maye zî û vila benê. Bi paştîdayîşê komelî gedeyî eşkenê nê halî ra bixelisîyê.’’