Rêxistina HDPyî ya Amedî qezaya Yenîşehîrî de kongraya xo ya çarine kerde.  Heyata  kongreyî de pankartê bi kirdkî û kurmanckî ''no şar milê xo çewt nêkeno'' ame akerdene.

Kongre de qiseykerdişo verên hetê Wekîla HDPyî ya Amedî Remzîye Tosun ra ame kerdene. Tosune vat: '' Wa dost û dişmenî bizanê ke emser do biba serra serkewtişê kurdan. 2023 do bibo serra azadîya fîzîkîye ya Birêz Ocalanî.''

Hemserekanê HDPyî yê Amedî Gulîstane Atasoy û Zeyyat Ceylan zî tewrbîyayoxê konre selam kerdî û vat HDP hêvî yo, HDP şar o.

Serekê Pêroyî yê KKPyî Sînan Çîftyurekî zî vat: '' Ewro roje roja paştdayîşê HDPyî ya.''

Serekê Pêroyî yê PEK-Tyî Emîn Kardeşî zî vat: '' Ganî şarê kurdî bi yewbîyayîşî cewabê hêrişan bido.''

Vervatoxa HDPyî Ebru Gunay vat: ''Faşîzmê AKPyî her ca de hêrişê destkewteyanê kurdan keno. Rojawan de, Başûr de qirkerdişan keno.  Şarê ma tim mojeno ke hetê haştîye û demokrasî de yo. Weçînitişê 2023yî de AKP do bin bikewo. Ma pêro zanê ke Birêz Ocalan eşkeno verê şerî bigêro û haştîye bîyaro welatî. Îqtîdaro ke semedê polîtîkayanê şerî israr keno pê tecrîdî waştişê haştîye yê kurdan tecrîd keno.  Ma do pîya bi Birêz Ocalanî ameyoxêkê azadî de komelêkê  şayî înşa bikerê. Sînorê faşîzmê AKPyî çîn o. Şuxulnayîşê çekanê kîmyewîyan ra hat operasyonanê qirkerdişê sîyasîyî û qirkerdişan  xebatanê weçînitişî rayra beno.  Her îqtîdaro ke îradeyê kurdan nas nêkeno, vînîkerdişî rê mehkum o. Îqtîdarê AKPyî zî do vîn bikero. Şarî û cinîyî do ser bikewê.''