Partîya Şaran a Demokratîke (HDP), weçînitişanê 31’ê Adare de Stenbol de namzedî nêramotî û kerd ke tîfaqê AKP-MHP’yî bin bikewo. HDP nê weçînitişî de zî heman stratejî domneno û bi nê amacî hemeyê qezayanê Stenbolî de dest bi xebata weçînitişî kerd. Kombîyayîşê şarî ke hemserekê HDP’yî bi xo zî tewrê ci benê heta roja peyêne do dewam bikerê. Hem-vervatoxê Kongreya Şaran a Demokratîke (HDK) ê herêma 1’ine Koray Turkayî derheqê xebate û stratejîya HDP’yî de ANF’yî rê qisey kerd.

Hemverê Netîceyanê Weçînitişî de Derbe Ame Kerdene

Turkayî vat seba ke AKP nêeşka binkewtişî hezm bikero YSK’yî 6’ê Gulane de qerar da ke weçînitişê Stenbolî newe ra bêro kerdene, no qerarê YSK’yî hemverê netîceyanê weçînitişî de derbeyêk o. Turkayî ard ziwan, bi nê hawayî înan kerd ke bi destê YSK’yî îradeyê şarî xesp bikerê. Turkayî ard ziwan ke hemverê na yewe de meterîsêkê edalet û demokrasîyî awan bi û vat, „Bêguman aktoro tewr muhîm ê na bloka demokrasîyî HDP yo. Mucadeleyo ke seba demokrasîyî dayo û bedelê ke nê rayîrî de dayê werte de yê.“

Sîyaseto Nimûne yê HDP’yî

Turkayî vat ke HDP xeylî reyan bi problemê xespî dir têrî mendo û vat, „Ma dî ke şaredarîyê Kurdistanî yê ke bi îradeyê şarî ameyî weçînitine hetê AKP’yî ra bi rayîrê derbeyî ameyî xespkerdene. Bêguman bajaranê rojawanê welatî de seba ke tecrubeyêko winayên çinbi, pê nêhesîyayî. Bêhuqûqîya ke hemverê HDP’yî de ameyêne kerdene amî sereyê CHP, ÎYÎ Partî û Partîya Seadetî. HDP na babete de sîyasetêkê nimûneyî ramojnena ke hemverê xespî de ganî mucadeleyêko senên bêro rayraberdene.“

HDP’yî AKP Bin Fîna

Turkayî stratejîya HDP’yî ya nikayêne zî rast dî ke namzedî nêmotî ra û vat, „Babeta tengekerdişê AKP û MHP’yî de aktoro tewr muhîm HDP yo. Babeta nêramotişê namzedan û îqnakerdişê weçînitoxanê xo de zehmetîyî ameyî antene, labelê weçînitoxan ê Kurdan bêdibendî Stenbol, Mersîn, Antalya, Edene û Amed de AKP-MHP bin fînayî. Naye ra eşkena vajî ke bi motîvasyonêkê pîlî tewrê weçînitişanê 23'ê Hezîrane benê."