HDP do konferansê sibayî de xarîtaya rayîrî bewlî bikero

Konferansê Rêxistinbîyayîşê Merkezî yê HDP’yî yê 1’ine do siba dest pêbikero. Konferanso ke do di rojî bêro domnayene de do xarîtaya rayîrî bêro bewlîkerdene.

Partîya Şaran a Demokratîke (HDP) ya ka menga Gulane de dest bi konferansan kerd, do 3-4’ê Tebaxe de Amed de  Konferansê Rêxistinbîyayîşê Merkezî yê 1’ine virazo û konferansanê xo wîna biqedîno.

Konferanso ke bi şîarê ‘’Ma bi Sîyasetê Demokratîkî Faşîzmî Birijnê, Tirkîya Demokratîk Bikerê’’ Merkezê Kultur û Kongre yê Şaredarîya Bajarê Girdî ya Amedî de do bêro viraştene, do 800 delegeyî tewrê ci bîbê û hemserekê Pêroyî yê HDP’yî Sezaî Temellî qiseykerdişê akerdişî bikero. Reyna temsîlkarê KCD, HDK  û HDP û pabesteyanê ci tewrê ci bibê.

Konferansê Rêxistinbîyayîşê Merkezî yê HDP’yî yê 1’ine  de heta nika tewr tay 50 kombîyayîş, konferans û komxebatî yê herêmî  ameyî viraştene. 40 bajaran de nêzdîyê 40 bajaran de konferansê bajarî û kombîyayîşê amadakarîye ameyî viraştene. Cinîyan ê Meclîsê HDP’yî zî 7 herêman de kombîyayîşê amadekarîye viraştî. Meclîsê Cinîyano ke bi qeraranê xo yê xoseran tewrê konferansê pêroyî yê herême bi do bi nê qeraran tewrê Konferansê Rêxistinbîyayîşê Merkezî zî bibo. Reyna Meclîsê Ciwanîye yê HDP’yî zî kombîyayîşê xo viraştî û seba konferansî delegeyê xo bewlî kerdî.

HDP’yî heta nika heme konferansê xo de sîyaseto demokratîk, rayîrê 3’ine û çareserkerdişê problemê cimatî girewtî dest. HDP hedef keno ke goreyê netîceya Konferansê Rêxistinbîyayîşê Merkezî  herême ra dest bi hemleya xo newekerdiş û rêxistinkerdişî bikero.