HDP: Ma do mucadeleyî rê dewam bikero

HDP’yî vera xespkerdişê îradeyê şarî yê îqtîdarê faşîstî yê AKP-MHP’yî eşkerayîyêk daye û va: ‘’Na tena meseleya HDP û Kurdan nêya, meselaya hempare ya heme şaranê Tirkîya ya. Bêveng memanê, bêvengîye tesdîqkerdiş o.’’

Heyetê Rayberdişî yê Merkezê HDP’yî derheqê xespkerdişê Şaredarîyanê Bajaran ê Pîllan ê Amed, Wan û Mêrdînî de eşkerayîyêk daye.

Eşkerayîya HDP’yî wina ya: ‘’

‘’Hemşaredarê ma yê ke Amed de  bi sede 63, Mêrdîn de sede 56 û Wan de sede 53 reyan ameyî weçînayene bi fermanê bêhuqûqî yê Wezîrîya Karanê Zereyî wezîfe ra ameyî girewtene û îradeyê şarî ame xespkerdene. Operasyonê vera endamanê ma yê Meclîsê Şaredarîye û xebatkaranê şaredarîye dewam keno.

Derbeya Sîyasîye ya

Na derbeyêka newe ya sîyasîye ya. Heman wextî de vera îradeyê şarê Kurdî tewirêko dişmenkî yo. Wezîrîya Karanê Zereyî bi nê qerarê xespkerdişê heq û azadîyan û îradeyê şarî, fermanê derbe dayo. Demê qeyûmî de nê hîrê şaredarîye açarîyayebî enqazan. Bi sebebo ke îqtîdar û Wezîrîya Karanê Zereyî nêwazenê bêhuqûqîye û neheqîya ke qeyûman kerdo vejîyo werte, paştî daye  înan. Nika meşruyetê nê îqtîdarî nêmando. Îradeyê şarî yo weçînitiş de vejîyo werte bi zext yeno xespkerdene. Şarê ma senî ke cuwa ver zî qebûl nêkerd do ewro ra tepîya zî vera na neheqîye vengê xo berz bikero û wayîr îrede û partîya xo bivejîyo.

Bêveng Memanê, Bêvengîye Tesdîqkerdiş o

Ma veng dana heme şaran û hetanê demokratîkan ê Tirkîya ke wa vera îqtîdaro ke îradeyê şarî nasnêkeno vengê xo berz bikerê. Vera nê îqtîdarî şuxulnayîşê heme rayîranê mucadeleyî yê demokratîk û meşrûyan heqêko bingeyên o. Demokrasî tena bi mucadeleyê hemparî yê hêzanê demokrasî yeno destfînayene. Na tena meseleya HDP û Kurdan nêya, meselaya hempare ya heme şaranê Tirkîya ya. Bêveng memanê, bêvengîye tesdîqkerdiş o.’’