Heyetê Rayberîya Merkezî ya HDP'yî eşkerayîyêka nuştekîye weşanaye û da zanayene, ‘cigêrayîş û metodê çareserkerdişê problemî yê bi hawayî şer û şîdetî’ sedemê heme krîzanê welatî yê. Eşkerayîya HDP'yî de ame vatene, serdestdarîya AKP’yî rixmê naye zî polîtîkayanê şerî de israr kena û krîzî welatî girantir kena.

HDP'yî da zanayene, şer bêçaresîye ya,  welat û cimatî bê ameyox verdano, çimeyanê welatî qedêneno, bîlançoyê mergê merdiman zêde keno û vengdayîş bi serdestdarîye kerd ke na şaşîye ra agêro.

Eşkerayîye de ame vatene, “Şer bêçaresîye ya, xeletî û mergî de israr o, welat û cimatî bê ameyox verdiş o. Prosesê problemê Kurdî nîşanê naye yo tewr giran o. Polîtîkayê Sûrîye yê ke îflas kerdo zî nîşanê naye yê. Rixmê naye zî serdestdarîye operasyonê eskerîye yê ke serra 1983 ra nata yenê kerdene zêde kena. Hêrişo bi eskeran, teyareyan û helîkopteranê şerî yê vera Rayberîya Herême ya Kurdistanî her çî ra ver vera huqûqu mîyanneteweyî yo. Îxlalkerdişê bandureya welatêkê cîranî yo. Çîyo tewr muhîm zî cehdkerdişê seba girankerdişê peroblemanê ke vernîya aşitîya cimatî gênê yo.

HDP'yî ard vîrî ke, heta nika bi eynî amancî tewr kêmî 30 operasyonî ameyê kerdene, tu problemêk çareser nêkerdo û teberê çinkerdişê çimeyanê welatî û girankerdişê bîlançoyê mergê merdiman de çîyêk nêameyo destkerdene. Eşkerayîye de vengdayîş bi serdestdarîye kerd ke na şaşîye ra agêro.