HDP: Wina fam beno ke serekkomar ekonomî de ‘zanayîşî‘ ra zafêr goreyê ‘dogmayan’ fikrêno, na tengîya ê ya vînayîşê ekonomî gama ke ver bi peynîya serre enflasyon û bêkarî de negatîfîyê pîlî virazîyayî do hetê cimatî ra hîna rind bêro famkerdene.
HDP’yî vat Bankaya Merkezî faîz se ra 24 ra fîna se ra 19.75 la no krîzê ekonomî yê Tirkîya rê çare nêyo û vat: “Nê gamî ravêrtox û seba xoramotişî yê, ma vanê nê game winayênî do çareserîya problemanê bingeyênan ê ekonomî rê faydeyêk nêresnê.
Vervatoxê Grûba Xebatanê Masaya Ekonomî-Polîtîke ya HDP’yî Necdet Îpekyuzî yo ke eşkerayîya nuştekîye wende nê vatî: “Bankaya Merkezî dimayê kombîyayîşê Heyetê Polîtîkaya Pereyî ra dima faîz se ra 24 ra fîna se ra 19.75. No kemîkerdişê faîzî xusûsen zî hîrê sebeban ra surprîz nêbi. Yewin konjonkturê dinya yê ekonomî wextêk o ke welatanê merkezan de sînyalanê hîrabîyayîşê pereyî dano. Dîyin seba ke serekê pêroyî yê AKP’yî Erdogan derheqê têkilîya mabênê faîz û enflasyonî de wayîrê bawerîyêka şaşe yo israrê xo yê derheqê kemîkerdişê faîzî de domneno. Hîrêyin zî seba ke serekê Bankaya Merkezî yê verênî nêwaştêne faîz kemî bikero bîzat hetê Erdoganî ra amebi vatene ke do gure ra bêro girewtene. Nê heme sebeban ra no kemîkerdişê faîzî nêbîyo kemîkerdişêko ‘şok’.‘’
Ma vînenê ke qerarê ke hetê hukmatî ra yenê girewtene nêeşkenê xo dir asanîya ekonomîke bîyarê. Ma seba terzê xoîdareyî yê çareserîye vanê ke viraştişê Qanûnêkê neweyî şert o.”
