Vervatoxa Komîsyonê Huqûq û Heqanê Merdiman ê HDP’yî parlementera Êlihî Ayşe Acar Başarane û parlementerê Êlihî Necdet Îpekyuzî derheqê tepişteyanê ke grevê vêşanîye û rojeyê mergî qedênayo de, Merkezê Pêroyî yê HDP’yî de kombîyayîşê çapemenîye viraşt.

Başarane kombîyayîşî de bale ante nînan ser: “Tayê hepisxaneyan de rîyê tewiranê bikeyfîyan ra serê cuya tepişteyan de têgêrayîşê xeternakî yenê kerdene. Bi taybetî Hepisxaneyê Wanî de. Rayberîya Hepisxaneyê Wanî cewab nêdana randevûyanê ma yê seba kombîyayîşî. Rayberîya hepisxaneyî cewab nêdana cehdkerdişanê Baroyê Wanî û Yewîya Tabîbanê Tirkî (TTB) zî. 8 tepişteyî roja verêne de sewqê nêweşxaneyî ameyê kerdene labelê seba ke nê tepişteyan red kerdîbî ke qawişa tepişteyan de bêrê tedawîkerdene, tedawîya înan nêameya kerdene û tepişteyî berdê bi hepisxane. Hîna zî hepisxaneyan ra tu sewqî nêameyê kerdene.  Ma dana zanayene ke rayberîya hepisxaneyan weşîya tepişteyan ra berpirsîyar a. Ma vengdayîş bi selahîyetdaran kenê ke ganî gamanê qanûnî bidê destpêkerdene û seba weşîya tepişteyan zî her çî bikerê.”

Parlementerê HDP’yî Dr. Necdet Îpekyuz zî bale ante serê nê qalan: “Goreyê peymananê mîyanneteyî dimayê qedênayîşê grevê vêşanîye ganî tedawî bêra kerdene. 3 hezar kesî grevê vêşanîye de bîyî. Ma vînenê ke tayê hepisxaneyan de seba tedawîya tepişteyan çîyê şaşî û xeternakî yenê kerdene. Ganî goreyê rayberîya weşîye ya Wezaretê Weşîye û Yewîya Tabîbanê Tirkî têgêrayîş bikerê. Waştişê ma o  yo ke sazgehê sîvîlî yê cimatî û heyetî xoserî ganî şorê serdana tepişteyan û hetkarîye bidê prosesê qedênayîşê grevanê vêşanîye.”