Partîya Şaran a Demokratîke (HDP) encamnameyê kombîyayîşê 10’ê Temmuze ke bi tewrbîyayîşê hemserekê pêroyî yê HDP’yî Sezaî Temellîyî û endamanê meclîsê HDP’yî yê Amedî viraştibi rayapêroyîye dir pare kerd.

 HDP’yî de encamname de pêhesna ke do hemverê tecrîdî û faşîzmî de heta peynî mucadele bikero û do îqtîdarî dawetê demokrasî bikero.

 HDP’yî pêhesna seba îqtîdarî bianco mîyanê waştişanê cimatî yê demokrasîyî, aşitîye û azadîye, bi îqtîdarî nê waştişan bidê qebulkerdene û do mucadeleyê xo hîna xurt bikerê.

 HDP’yî bi çend madeyan encamname wina pare kerd:

“ * HDP, seba xurtbîyayîşê tîfaqê demokrasîyî çi bikewo serê milê ci do bikero. 

* Do seferberîya ma ya organîzebîyayîşî bêmabên dewam bikero. Organîzasyonanê ma yê qeza û bajaran kampanyaya endamîye daya destpêkerdene.

* Problemê Tirkîya yo sereke nêbîyayîşê qanûnê bingeyên ê demokratîkî yo. Partîya ma seba qanûnê bingeyên ê demokratîkî ke şaran û bawerîyanê cîyayan xo de cemêneno dest bi xebatan kerd. HDP do qanûnê bingeyênî yê çarçewaya werêameyîşê cimatî esas bigêro.

* Sey HDP seba qanûnê bingeyên ê demokratîkî çi mesuldarî bikewo milê aye do bikero. Seba paketa ‘Reformê Hukmî’ do fikir û vînayîşanê organîzasyonanê cimatî yê demokratîkan bêro persayene.

* HDP do seba kesanê ke qey fikir û vatişanê xo ameyê tepiştene bêrê veradayene, seba ke rojnameger, sîyasetmedar, huqûqnas, pawitoxanê heqanê merdiman, akademîsyen, wendekaranê unîversîte rîyê fikir û îfadeyanê xo ra nêrê muhakemekerdene û tepiştene, binê nameyê ‘Sîyasetê demokratîkî rê û fikirî rê azadîye’ kampanya bido destpêkerdene. Kombîyayîşanê şarî û mîtîngan virazê û kampanyayanê îmzayan bidê destpêkerdene.

* Hemverê krîzê ekonomîkî de seba ke vernîya betalî û feqîrî bêro girewtene do sîstemê kooperatîfan, komunê ekonomîye, torê destekî ûsn. bêrê organîzekerdene.

* Hemverê polîtîkayanê şerî seba aştîyêka mendeye û demokratîke do kombîyayîşê şarî, panel, terraqe û mîtîngî bêrê viraştene. Na çarçewa de do Amed, Stenbol, Wan, Mersîn û Îzmîr de mîtîngê bi slogana “Şerî rê nê, hema nika muzakereya demokratîke û aşitîya bianore” bêrê viraştene. Mîtîngo ewilên do 22’ê Temmuz a 2019’î de Amed de virazîyo. 1’ê Êlule de zî do xeylî bajaranê cîyayan de mîtîngê bajaran bêrê viraştene.”