HDP’yî seba cigêrayîşê qetlîamê Sêwregî heyetêk pêard

HDP’yî seba cigêrayîşê qetlîamê  qezaya Sêwregî ya Riha heyetêk pêard.

HDP’yî bi eşkerayîyêk da zanayene ke înan seba cigêrayîşê cînayetanê qezaya Sêwreqî ya Riha heyetêk pêard û nê pare kerdî:

‘’Qezaya Sêwregî ya Riha de qewimîyayîşo ke sey ‘pêkewtişê eşîran’ ame ramojnayene  bi weşanayîşê dimenan yeno dîyayene ke qetlîam o. Seba cigêrayîşê nê qewimîyayîşî ma heyetêk pêard. Bi nê waştişî parlamenterê ma yê Riha û huqûqnasan ra heyetêk siba Sêwreg de  bi rêxistinanê cimatî yê sivîlan, şahîdê qewimîyayîşî û merdimanê mexdûran dir do pêvînayîşan virazî. Dimayê cigêrayîşî do raporê heyetê ma rayapêroyî dir bêro parekerdene.’’