Dewlete erdlerzî ra dima bi îdîayê talankerdişî Halo Îstîsna îlan kerd. Nê vatişê dewlete bîyî sebebê ê vîdeoyanê îşkenceyan ke medyaya sosyale de bi etîketê ‘talanker’ vila bîyî. Dima eşkera  bi ke êyê ke îşkence dîyî, yan zerrîwaz yan zî mexdûrê erdlerzî bîyî.

Komîsyonê Huqûq û Heqanê Merdiman ê  HDPyî derheqê  îşkence û şîdetî yê herêma erdlerzî de derheqê Wezaretê Karanê Zereyî, walî, hetkaranê walîyan, mudiranê polîsan   û kesanê ke hêriş  kerd ya zî hêriş da kerdene de pêhasnayîşî sûcî kerd.

HDPyî pêhesnayîşê sucî de bale ante mewzûata netewî û mîyanneteweyî ser o û wina vat: ‘‘Dîmenan ra ma vînenê ke hezê ewleyî û tay sivîlî bi îdîaya ‘dizd-talanker’ şarî rê îşkenceyê kenê. Û ma vînenê ke pesnê nê kesan yeno dayene û yenê pîroz kerdene. Ma wazenê ke wa wezîfedarî yew bi yew nê kesan tespît bikerê û derheqê înan de dewa akerê.’’