Kongreya Demokratîke ya Şaran (HDK) bi şîarê 'Vera faşîzmî û kolonyalîzmî ma mîyanê meclîsanê demokratîkan de bêrê yewca. Bi komelê azadî û rêxistinbîyayeyî ma cuyêka newîye awan bikerê' Îstanbul de Kongreya Pêroyî ya 12. kerde.

Kongre de reyna Esengule Demîr û Cengîz Çîçek sey hemvervatoxan ameyî weçînayene. Demîre û Çîçek dima qisey kerd.

Qiseykerdişê hemvervatoxan de verî bale ameye antene girîngîy azadîya cinîyan ser û ame vatene ke rixmê dişmenîya AKP-MHPyî zî cinîyî têkoşîn de israr kenê û qetî do ser bikewê. Hemvervatoxan îfade kerd ke kedkar û karkerî do dormeyê HDKyî de bêrê pêser û pêro heqanê xo bivisnê destî. Hemvervatoxan vist vîrî ke talanê xoza dewam keno û têkoşînê înan o ekolojîk zî bêmabên dewam keno. Hemvervatoxan pare kerd ke HDK venga her kesî dano ke wa xoza bipawo.

Hemvervatoxan da zanayene ke HDK do vera nîjadperestîya serê koçber û multecîyan têkoşîn bikero, Rayîrê Hîrêyînî de polîtîkayanê koçber û multecîyan virazê. Hemvervatoxan ard ziwan ke têkoşînê Rayîrê Hîrêyînî hînî şert o û seba ke bingeyê sîstemê demokratîkî bêro eştene HDK do rêxistinîya komelî pîl bikero. Hemvervatoxan pê hesna ke ê do weçînayîşan de paştî bidê Îtîfaqê Rayîrê Hîreyênî û îqtîdarê AKP-MHPyî yê faşîstî sindoqan de bin bivisnê.

Hemvervatoxan peynî de bale ante tecrîdê vera Rayberê Şarê Kurdî Abdullah Ocalanî ser û ard ziwan ke heta ke tecrîd nêro wedaritene meseleya kurdan û krîzê Tirkîya çareser nêbenê.