Wekîlê HDPyî 21ê kanûna 2022yî ra nata vera tecrîdê serê Rayberê Şarê Kurdî Abdullah Ocalanî verê Wezîrîya Edaletî de Nobeta Edaletî kenê. Çalakîkeranê nobete ra Wekîla HDPyî ya Şirnexî Nurane Îmîr derheqê çalakîya înan de ANFyî rê qisey kerd.

Nurane Îmîr vist vîrî ke 1999 ra nata vera Ocalanî tecrîdêko giran est û tim pê bahaneyan pêvînayîşê bi keye û avûkatan yenê astengkerdene. Îmîre vat: ''11 serran de 5 pêvînayîşê keye û avûkatan ameyî kerdene. 2 serrî yo pêvînayîşî bi temamî yenê astengkerdene. Ma sey wekîlanê HDPyî verê cû zî xeylêk çalakîyî kerdî. La îqtîdarî goş nêda ma. Reyna hem avûkatan, hem dezgehanê sivîlan hem zî HDPyî seba pêvînayîşî verê cû muracat kerd la cewab nêdîya nînan.''

Wekîle Îmîre bale ante ser ke tecrîdo mutlaq beno sebebê qesawetan, alozîye û rewşanê xiraban. Îmîre vat: ''Kesayet û pozîsyonê Birêz Abdullah Ocalanî hetê her kesî ra zanîyenê. Pê krîmînalîzkerdiş yan zî peygoşkerdişê ney ê do nêeşkê tesîrê Ocalanî yê serê komelî bişiknê. Pêvînayîşêkê bi Ocalanî eşkeno alozîya welatî çareser bikero. La êyê ke şer û kaosî ra paştî gênê nê pêvînayîşî nêwazenê. Teyna îqtîdarê AKP-MHPyî ney hêzê mîyanneteweyî zî ney nêwazenê. Ma seba ke Birêz Ocalan bieşko avûkatanê xo bivîno 21ê kanûne ra nata nobete gênê. Heta ke ey reyde pêvînayîş bêro kerdene ma do çalakîya xo rê dewam bikerê.''