Sereka Weqfê Heqanê Merdiman a Tirkîya (TÎHV) pispora Tibê Edlîyî Prof. Dr. Şebnem Korûr Fîncanci nizdbîyayîşê gama ke tepişteyî yenê hewilnayene bi nêweşxaneyan û astengîyê ke tedawîye de yenê vetene ANF’yî rê ercnayî.

Fîncanci vist vîrî ke grevê vêşanîye verê hîrê rojan qedîyayî, la hewna zî organîzasyonêko bi rêk û pêk nêameyo amadekerdene. Fîncanci vat, “Hewna nêameyo tespîtkerdene ke do kamî berê nêweşxane, kam do kampûsanê nêweşxaneyan de bêro tedawîkerdene yan zî kam do revîran de bêro tedawîkerdene. Rasta ci, eke organîzasyonêko rind estbîyêne, do gama qedîyayîşê grevanê vêşanîye û rojeyê mergî de lîsteya tepişteyan biameyêne amadekerdene û biameyêne zanayene ke kam ganî bi hawayêkê lezgînî sewqê nêweşxaneyî bêro kerdene.”

Fîncanci ard ziwan hewilnayîşê tepişteyanê sîyasîyan bi nêweşxaneyî agêrayo îşkenceyî û vist vîrî ke hewilnayîşê tepişteyan bi wesayîtanê rîngî nêno qebûlkerdene, ganî merdimê nêweşî bi ambûlansan bêrê hewilnayene.

Fîncanci hemverê mûayenekerdişê bi kelemçeyî zî razînêbîyayîşê xo ard ziwan û na babete de vat, “Ganî Protokolê Stenbolî bêro bicaardene. Nêbeno ke doktor bi nê hawayî, bi kelemçeyan muayene bikero. Nêbeno ke heqê merdiman ê xusûsîyî bêrê binpaykerdene û binê çimdarîya hêzanê asayîşî de merdimî bêrê mûayenekerdene.”

Fincanci bale ante serê heqaret û kerdişanê xiraban ê wextê hewilnayîşî yê ke ro tepişteyanê sîyasîyan yenê kerdene û vat, tena cendirmeyî nê heman wextî de wezîrê Karanê Zereyî zî mesuldar o.

Fîncanci bale ante serê muhîmîya wayîrvejîyayîşê çalakgeranê grevê vêşanîye û vat, ganî vîtamînê B’yî qetîyen bidîyo tepişteyan ê çalakgeran ê sîyasîyan, bi heme mîneralan bêrê weyîkerdene û werê seba pitikan înan rê bêrê dayene û werdayîşêko winayên heme zîndanan de bêro bicaardene.

Fîncanci reyna waşt ke doktorê xoserî tewrê nê prosesî bêrê kerdene.