Hemsereka Konseya Rayberdişî ya KCKyî Besê Hozat beşdara bernameyê taybetî yê Medya Haberî bîye û rojdem ercna.  Qiseykerdişê Hozate ra tay qismê girîngî wina yê:

''Ma hê serrgêra Komployê 15ê Sibate de yê ke rojêka reş a. Komplogerî hêrişanê xo rê dewam kenê. La Rayberê ma, gerîlayê ma, şarê ma û têgêrayîşê ma vera nê hêrişan bi xurtî xo ver danê. Komployê Mîyanneteweyî armanc kerdêne ke Rayberê ma û têgêrayîşê azadîye tasfîye bikero. Xêrê xoverdayîş û têkoşînê şar û gerîlayanê ma ra nê armancî pûç bîyê. 

Tecrîd û sîstemê îşkenceyî yê Îmraliyî dewamê Komployê Mîyanneteweyî yê. Têkoşînê ma yê vera tecrîdî zî dewam keno. Eke ewro Komîteya Heqanê Merdiman a NYyî vana 'Îmrali de birnayîşê têkilîye yo mutlaq est o û ganî bêro wedaritene' no netîceya têkoşînê vîst û çar serran o. Netîceya têkoşînî de Komîte neçare mende ke na eşkerayîye bida. La şarê kurdî herinda qiseyan de pabeyê gamêka pozîtîf o. Ganî NY na babate de vera Tirkîya tewirêkê cidîyî bimojno. 

CPT êlule de şi Îmrali la derheqê babete de eşkerayîyêke nêdaye. Xora şarê kurdî eşkerayîyan ra mird o. Şarê kurdî hewceyê têgêrayîşêkî yo. Îşkence û tecrîdê Îmraliyî berhemê nê dewletan ê. Nê hêzanê mîyanneteweyîyan Rayberê ma teslîmê Tirkîya kerd. Nê hêzî şirîkê hêrişanê vera kurdan û sîstemê Îmraliyî yê. Ma hînî pratîkî wazenê. Ganî Konseya Ewropa hînî nêba hemkara nê kerdişan. Ganî hêzê mîyanneteweyî vera hêrişanê serê kurdan bêveng nêbê. 

6ê sibate de Rayraşîyayîşê Gemlîkî Qoser û Geverî ra dest pêbikero. Vera Komployê Mîyanneteweyî çalakîyê şermezarkerdişî ganî bi heybetî bêrê kerdene. Ganî ma 2023 de azadîya Rayber Apoyî bîyarê ca. No armancê ma yo esas o. 

Parlamentoyê Almanya Qirkerdişê Êzidîyan şinasna. Teyna pê şinasnayîşî nêbeno. Ganî nê dewletî vera hêrişanê serê êzidîyan zî têbigêrê. Şarê êzidîyan seba destkewteyanê xo xeylêk têkoşîn kerd. Ganî Îdareyo Xoser ê Şingalî bêro şinasnayene. Ganî hêrişê dewleta tirke yê vera Şingalî bêrê çinkerdene. Dewleta tirke paştî daye hêrişanê DAÎŞî ke êzidîyî qir kerdî. Coka ganî dewleta tirke zî çarçewa Qirkerdişê Êzidîyan de bêra muhakemekerdene.''