Paytextê Îngîlîstanî London de vizêr serkeşîya sendîkayan û Meclîsê Şarê kurdî de Konferansê Abdullah Ocalanî rê Azadîye ya 2. ame kerdene.

Roniştişê bi sernameyê  'Jin Jiyan Azadî' de akademîsyen û Endama Komîteya Jîneolojî ya Londonî Lîda Kayhlo qisey kerd. Kayhlo sere de Nagihane Akarsel, Hevrîne Xelef, Sakîne Cansiz, Leyla Şaylemez, Fîdane Dogan û Emine Kara yê ke hetê dewleta tirke ra ameyî qetilkerdene yad kerdî. Kahhlo vist vîrî ke xeta azadîye cinî  ya Abdullah Ocalanî heme cinîyan ê dinya rê bîya çimeyê îlhamî û vat: ''Abdullah Ocalan wina hêz o ke eşkeno heme cinîyan ê dinya bîyaro têhet.  Rayraşîyayîşê cinîyan ê kurdan bi şîarê  ‘Jin jiyan azadî’ açarîya serewedartişê azadîye.''

Roniştişê bi sernameyê 'Konferalîzmê Demokratîkî' de Dr. Seewan Saeedî qisey kerd. Saedî ke qala prosesê tarîxê demokrasîyî kerd, vat: ''Konseptê demokrasî hetê Abdullah Ocalanî ra nêvejîya werte  la pê ey resa paradîgmayêk, sîstemêkî. Ocalanî heme konseptê demokrasî açarnayî yew tezî û çîyêko bêhempa vet werte.''

Qiseykerdişê qefilnayîşî yê konferansî hetê Raybero verên û Wekîlê Partîya Karkeran Jeremy Corbynî ra ame kerdene. Corbynî wina qise kerd: ''Nika waxtê vîrardişê zextanê vera kurdan ê sessera peyên o. Kurdî badê cumbîyayîşê Osmanîyan ra nata her warî de raştê zextî ameyî. Kurdan bi hewayêkê qerardarî semedê pawitişê nasname û ziwanê xo têkoşîn kerd. Têkoşîn kerd ke qederê xo bi destê xo tayîn bikerê. No têkoşîn bi sebebê cuya bi hezaran kurdan. Ez tarîx, kultur û nasnameyê kurdan rê hurmet kena. Mi xeylêk rey Kurdîstan zîyaret kerd. Xopawitişê kurdan zaf bimana yo. Kurdan tim tengayî ante, çirey haştîye nêdî. Erdlerzê Tirkîya û Sûrîye de zî ame vînayene vera kurdan senî yew sîstemo xirab est o.''

Jeremy Corbynî vat: ''Heta ke Abdullah Ocalan zîndan de bo haştîye û çare aver nêşinê. Ocalan bi serran o binê hêriş û tecrîdî de yo, nika tira xebere nîna girewene. Eke ma haştîye wazenê ke ma wazenê,  o wext ganî muzakereyî bêrê kerdene. Muzakereyî ganî hetê temsîlkaranê şaran bêrê kerdene. Gama ke esaretê Nelson Mandela qedîya, prosesê haştîye dest pêkerd. Her çîyî bi azadîya Mandela dest pêkerd.  No zî mojneno ke prosesêkê haştîye hewce keno. Ganî Abdullah Ocalan azad bo ke tewrê muzakeran bibo. Çunke no muzakereyê haştîye têna bi ey mumkun o.''