Endamê Komîteya Rayberdişî ya PKK’yî Dûran Kalkan bi meymanê programê Ulkeden ê kanalê Medya Haber TV’yî û rojdem ercna.

Kalkanî derheqê hêrişê Xakurkê  de nê vatî:

‘’Dimayo ke DAÎŞ  Teşrîna Verên a 2017’î de Reqa de bin kewt hetêk ra hêrişê Kerkûkî kerd, dima zî Kanûn a 2017’î de vera Xakurkê û Çele ya 2018’î de vera Efrînî dest bi hêrişî kerd. Nîsan a 2018’î de resayî Qilê Lêlîkanî. Nika 25-26’ê Gulane ra tîya de hêrişê leşkaran esto.

Bi Hêrişê Xakurkê Wazenê Rojawan û Başûrî Îşxal Bikerê

Dewleta Tirkî wazena ke Efrîn ra heta Xakurkê îşxal bikero. Semedê naye plan, qerar û projeyê înan esto. No eşkera yo. Wazenê ke leteyanê Rojawan û Başûrî yê Kurdistanî îşxal bikerê. Hetêkê na herême Efrîn hetêk zî Xakurkê Bradost o. Wetê ci zî Rojakewtena Kurdistanî ya a zî binê destê  Îranî de ya. No qetî têgêrayîşê îşxalî yo. Rehendê ci yo îdeolojîk qirkerdişê Kurdan o. Wazenê ke Kurdan tarîx ra biesterê. Bi her metodî qirkerdişî  bica anê. Hetêk ra zî stratîjîk o. Îşxalkardişê di leteyanê Kurdistanî hedef kenê. Bi Hedefêkê stratejikî  sinoranê Tirkîya xêze kenê. Ganî bitaybetî Kurdê Başûr û Rojawanî na raştîye vînê û fam bikerê.

Nêwazenê Serkewtişê Grevê Vêşanîye Rojdem de Bimano

Rehendê diyînî zî sîyasî yo. Bitaybetî hêrişê peyênî cade verê roşanî û roja roşane de lezûbez ameyî kerdene. Heme giredayeyê weçînitişê Stenbolî yê. Senî ke grevê vêşanîye bi xoverdayîşî faşîzm rê peyser game daye eştene, têgêrayîşê demokrasi îradeyê xo xurt kerd, zanayîşo demokratîk bi vila. Têrsê naye ra, seba ke vernîya naye bigêrê û destûr medê serkewtişê grevê vêşanîye rojdem de bimano cade dest bi hêrişê Xakurkê kerd. Bi naye wazenê ke rojdemî bibedilnê. Rehendê ci yê rojdemê sîyasî zî esto. No rehend zî waştişê serkewtişê weçînayîşê Stenbolî yo. Ganî her kes nayî vînê. Eşkerayo ke semedê raygirewtişî no hêriş yeno kerdene.

Seba Pawitişê Qilêk 7 Qilî Tepiştî, Nika yê 7 Qilan do Kam Bipawo?

Rehendê hîrêyinî zî eskerî yo. Rehendê eskerî de senî ke medyaya AKP’yî  vana wina nîyo, raştîya ci wina  ya: Înan par Qilê Lêlîkan tepişt. Gerîlayan vera înan her roje çalakîyî viraştî. Semedê pawitişê Lêlîkanî dormeyê ci sey xetê asayîşî ame girewtene. Wazenê ke dewanê derûdorî zî veng bikerî. Bitaybetî zî dewê Bradostî bi teyareyan yenê bombardûmankerdene. Hêzê PDK û Iraqî benê birîndar. Xebera ma ya somut esta. Wazenê ke semedê pawitişê Lêlîkanî ê dewan veng bikerî. Semedê pawitişê yew qilî 7 qilî tepiştî, nika ê 7 qilan do kam bipawo?  Sey Efrînî  wazenê ke Bradost zî veng bikerê. No qirkerdiş o.  Ûca tewr tay 150 dewî estî. Teyna Dola Xakurkê de tewr tay 15 dewî estî.  Sinorê Rûbarok-Şemzînan ra heta Sîdekanî bi seyan dewî estî. Seba ke dewijî bitersê û biremê danê dewan ro. No teyna têgêrayîşê îşxalî nê têgêrayîşê qirkerdiş û surgunî yo. Pakkerdişê etnîkî yeno kerdene.

Vera Îşxalî Ganî Heme Hêzê Kurdan Bibê Yew

Hetê Kurdan ra zî rehendê ci esto. Na çarçewe de eşkerayo ke dewleta Iraqî ya  ke vera hêrişan bêveng a pêkerdişê ci bi dewleta Tirkî esto. Na nuqta de ma wazenê ke îdareyanê PDK-YNK’yî hem hîşyar bikerê hem zî veng bidê înan. Vera heme Kurdan hêrişêk esto. Ganî vera naye me pêro pîya tê bigêrê. Ma naye rê amade yê. Ma eşnawenê ke PDK mîyanê nê îtîfaqî de yo. Dewleta Tirkî qilanê vakurî PDK zî  qilanê başûrî tepişena. Xeta Goşîne, Qirekê Berbizinî, Kanî Kirêj û qilê ke aşîretî Bradostî tede yê pêşmergeyê PDK’yî wazenê tepişê. Wina zî eşkera eyseno ke hêzê PDK’yî pîya  bi artêşa Tirkî vera PKK’yî operasyon virazeno. Eke raşta wina yo, no  çîyêko zaf bitehluke yo. Eke PDK sey 1997 Başûr de vernîya gerîlayî bigêro, meverdo pîya bi şarî vera îşxalê Tirkî xover bido.  No yeno manaya şerî. Peynîya nayî beno şer wa her kes bizano. Ma  semedê mucadeleyê hemparî amade yê. Ma pêkewtişê zereyî nêwezanê û vera şerê way-birayî yê. La eke sey quricîyanê vakûrî paştî bidîyo qetilkar-faşîstanê  Tirkî no şer ano. Vengdayîşê ma vera îşxalî xoverdayîşo hempar o.’’