Endamê Komîteya Rayîrberdişî ya PKK’yî Murat Karayilanî Radyoyê Dengê Welatî rê qisey kerd vat. Ercnayîşanê Karayilanî tayî cayî wina yê:
Nê Hêrişî Vera Estbîyayîş û Heqîqetê Kurdan ê
‘’Hêrişê peyênî yê ke rejîmo faşîst ê AKP-MHP-Ergenekonî vera îradeyê şarê ma kerdî, hêrişêkê plankerdeyî. Amed, Mêrdîn û Wan bitaybetî ameyî wîjnayene. No tena binpaykerdişê ehleq, huqûq û demokrasî nê, heman wextî de binpaykerdişê îrade, anor û şerefê şarî yo. Hêrişêkê cîdîyî yê. Bi nê hêrişanê peyênan şexsê HDP’yî de heme şarê Kurdî ame hedef girewtene. Xora her hîrê hemşaredarê ke wezîfeyî ra ameyî girewtene mîyanê şarê Kurdî de yenê naskerdene û her kesî temsîl kenê. Nê hêrişî vera estbîyayîş û heqîqetê Kurdan ê. Îqtîdaro faşîst ê AKP-MHP-Ergenekonî yo ke peynîya ci nêzdî bîyo rojê tarî yê ke înan pawenê vînenê coka hêrişanê xo zêdînenê. Seba ke vînîkerdişê xo binimnê dimayê weçînitişî reyna hêrişê Kurdan kerd. Îxtîmalo gird o ke ê wazenê 2020 de weçînitişê rewî virazê.
Keştîya Erdoganî ya ke Her Hetî ra Awe Gena, Cûm Bena
Heman şewe de yanî 19’ê Tebaxe de pîya bi xespkerdişê şaredarîyan, 29 bajaran de çarçeweya operasyonanê qirkerdişê siyasîyan de 500 kesî destbend kerdî û vera gerîlayan Colemêrg, Wan û Şirnex de operasyon dayî destpêkerdene. Hîrê planê cîyayî yê qirkerdişî, hîrê cayanê cîya-cîyayan de heman şewe û saetan de viste dewre. No konseptêk û planêk o. Bi şerê vera Kurdan wazenê şirê weçînitiş. Wazenê gonî birişnê û naye ser ra xo bidê ciwîyayene. La şarê Tirkîya û mûxalafet na rey nêxapîyayî. Kayê îqtîdarî ferq kerd. Ez bawer kedan ke na rey planê şerî ya leyşin ê Erdogan û AKP’yî do mereso amancê xo. Keştîya Erdoganî xeylî cayanê xo ra qule bîya her hetî ra awe gena û cûm bena. Qewîmîyayîşê rojanê peyînan zî naye ramojnenê.
Bêvengîye Hemkarîya Zulmî Ya
Rayber Apoyî pêvînayîşanê xo yê peyênan ê avûkat û keyeyî de da zanayene ke o semedê çareserîya amade yo. Nê hêrişî vengdayîşê Rayber Apoyî rê cewabo. No ganî wina bêro famkerdene. Înan şer vîjna. Mucadeleyê demokrasî û azadîye hem semedê şarê Kurdî û hem zî semedê hêzanê demokrasî yê Tirkîya kewt dewrêko newe. Nê demê neweyî de mucadeleyê gerîlayî reyna beno la tîya ganî têgêrayîşê şarî zaf vejîyo werte. Eke şarê ma rêxistinkerde wayîr îradeyê xo bivejîyo rengê demî yeno bedilnayene. Şarê ma ganî na babete de fedakarîye bikero û hêzê demokrasî yê Tirkîya zî wayîrê na mesele bivejîyê. Nê demî de bêvengmendiş bêvîjdanîye ya. Bêvengmendiş zulmî rê hemkarîye ya. Bêşik o ke nê mucadeleyî de Amed rayber o. La ganî mucadele tena bi Amed, Wan û Mêrdîn bisînor memano. Mucadele ganî her ca ra vila bo. Amed de zî hewce nêkeno her kes şiro merkezê bajarî. Wa her kuçe de têgêrayîş bibo. Nê hêrişî tena semedê ewro nê semedê sibayî yenê kerdene. Xoverdayîş ganî heme bajaranê Kurdistan û metropolan ra vila bo. Roje roja wayîrê şarefê xo vejîyayîşî ya.
Estbîyayîşê Gerîlayî Tersê Dişmenî Yo
Sîstemê Îmrali û zulmê zîndanan dewam keno. AKP û Erdoganî weçînitişê 31’ê Adare de HDP û Kurdan ra lapata girde werde. Amancêkê hêrişê înan ra yewî zî qesasgirewtiş o. Zindanan zî hemleya grevê vêşanîye de rolêko gird kay kerd û ser kewtî. Coka moralê înan berz o. Wa naye ra tepîya zî bimoral bî û rêxistinbîyayîşê xo xurt bikerê û kayanê dişmenî pûç vejê. Xora esas hedefê rejîmê AKP-MHP-Ergenekonî gerîla yo. Estbîyayîşê gerîlayî yeno manaya vînkerdişê faşîzmî. Gerîla çîyêk meko zî estbîyayîşê ci tersê dişmenî yo. Wina rolêko stratejîk ê gerîlayî esto. Gerîla hêzê azadîye û demokrasîye yo. Coka pîya bi herişkerişê şaredarîyan, gerîyayan rê hêriş ame kerdene. Operasyono ke ci ra vanê ’Kiran’ FaraşÎn, Çîya Reşkê, Berê Perik, Kato Marînos ra heta Kato Jîrka mabênê sînoranê Colemêrg, Şirnex û Wanî de yeno kerdene. Goreyê zanayîşanê ke kewte destê ma operasyon bin kewt.
Vateyê Kak Barzanîyî Bimana Yê
Birêz Kak Mesûd Barzanî bi wesîleyê Roşanê Qurbanî Belakatî de qisey kerd. Vateyanê ci ma bimana vînenê, bierc ê. No demo ke dişmen bi kayanê leyşinan wazeno mabênê Kurdan de problem û krîzan virazo, muhîmîya vateyanê Kak Mesûd Barzanîyî esta. Ma zî tewrê nê vatişanê ci benê û silam kenê. Ma pawenê ke nê vatişî tena qalî de memanê û pratîk de bêrê caardene û goreyê naye gamî bêrê eştene. Na çarçewe de vengdayîşê ma û Kak Mesûdî tansîyon biney ard war. Ma umîd kenê ke do gamî bêrê eştene.’’